ශ්‍රී ලංකාව පුරා ව්‍යාප්තව පවතින ඩෙංගු වසංගත තත්ත්වයට මුහුණදීම සඳහා රටේ මහජන සෞඛ්‍ය සහ වාහක මඟින් බෝවන රෝග පාලන හැකියාවන් ශක්තිමත් කිරීමේ අරමුණින් අමෙරිකා එක්සත් ජනපදය නව වැඩසටහනක් ආරම්භ කර තිබෙනවා. කොළඹ පිහිටි අමෙරිකානු තානාපති කාර්යාලය, සෞඛ්‍ය අමාත්‍යාංශය සහ ජාතික ඩෙංගු මර්දන ඒකකය එක්ව මෙම වැඩසටහන ක්‍රියාත්මක කිරිමටයි සැලසුම් කර ඇත්තේ. තාක්ෂණික සහයෝගීතාව සහ දැනුම හුවමාරුව මඟින් ඩෙංගු වැළැක්වීම, හඳුනාගැනීම සහ ඊට ප්‍රතිචාර දැක්වීමේ හැකියාවන් වැඩිදියුණු කිරීම මෙහි අරමුණ වී තිබෙනවා. අමෙරිකානු ආරක්ෂක දෙපාර්තමේන්තුවේ විදේශීය මානුෂීය, ආපදා සහ සිවිල් ආධාර වැඩසටහන යටතේ මෙම් සදහා අරමුදල් සැපයෙනවා. මෙම වැඩසටහන මගින් මදුරු බෝවන ස්ථාන විනාශ කිරීමේ වැඩසටහන්, මහජන දැනුම්වත් කිරීමේ වැඩසටහන් සහ පුරෝකථන මත පදනම් වූ වැළැක්වීමේ උපායමාර්ග ඇතුළු ශ්‍රී ලංකාවේ පුළුල් ඩෙංගු මර්දන ප්‍රයත්නයන්ට සහාය වීමට සැලසුම් කර ඇති බව සදහන්. ශ්‍රී ලංකාවේ ප්‍රජාවන්ට ඩෙංගු රෝගය තවදුරටත් බරපතළ අභියෝගයක් වී ඇති බවයි ශ්‍රී ලංකාවේ අමෙරිකානු තානාපති කාර්යාලයේ වැඩබලන තානාපති ජේන් හොවෙල් මහත්මිය පෙන්වා දෙන්නේ. මෙම හවුල්කාරීත්වය මඟින් ක්ෂණික වසංගත ප්‍රතිචාර හැකියාවන් මෙන්ම දිගුකාලීන මහජන සෞඛ්‍ය හැකියාවන්ද ශක්තිමත් කිරීමට හැකි වනු ඇති බව ඇය සඳහන් කළා. ආපදා සූදානම, මානුෂීය ආධාර සහ මොන්ටානා ජාතික ආරක්ෂක බළකාය සමඟ පවතින පුහුණු හවුල්කාරීත්වය වැනි හමුදාමය සහයෝගීතා වැඩසටහන් ඇතුළු පුළුල් එක්සත් ජනපද-ශ්‍රී ලංකා හවුල්කාරීත්වයේ කොටසක් ලෙසද මෙම වැඩසටහන ක්‍රියාත්මක වවනවා.
