දිවයින පුරා මහජන ආරක්ෂාව තහවුරු කරමින් දියේගිලීම් හේතුවෙන් සිදුවන මරණ අවම කිරීම සඳහා වූ පුළුල් ජාතික යාන්ත්‍රණයක් සකස් කිරීමේ ප්‍රගති සමාලෝචන රැස්වීමක් පවත්වා තිබෙනවා. ඒ, මෙම පූර්වගාමී පියවර සම්බන්ධයෙන් පවත්වන ලද ඉහළ පෙළේ සාකච්ඡාවේ ඉදිරි පියවරක් ලෙසයි. දියේ ගිලීමෙන් සිදුවන මරණ අවම කරමින් දිවයින පුරා මහජන ආරක්ෂාව තහවුරු කිරීම අරමුණු කරගනිමින්, සෝදිසියෙන් යුතු ජාතික රාමුවක් ස්ථාපනය කිරීම සඳහා අන්තර් – ආයතනික සහයෝගීතාව ශක්තිමත් කිරීම කෙරෙහි මෙහිදී මූලික අවධානය යොමු ව තිබෙනවා. සභාවාරය ආරම්භ කරමින් අදහස් දැක් වූ ආරක්ෂක නියෝජ්‍ය අමාත්‍යවරයා, පූර්ව සාකච්ඡාවේ ප්‍රතිඵල සහ මේ දක්වා ලබා ඇති ප්‍රගතිය පිළිබඳව දැනුවත් කර ඇති බවයි සදහන් වන්නේ. ඉහළ යන ජල අනතුරු සංඛ්‍යාව හුදෙක් සාමාජීය ගැටලුවක් පමණක් නොව, මහජන ආරක්ෂාවට මෙන්ම ජාතික ආරක්ෂාවට ද බලපාන සුවිශේෂී කරුණක් බව ඔවුන් පෙන්වා දෙනවා. දියේ ගිලීම් වැළැක්වීම සඳහා සඵලදායී, තිරසාර සහ බහු-ක්ෂේත්‍ර ප්‍රවේශයක් වහාම ගොඩනැගීමේ වැදගත්කමද මෙහිදී අවධාරණය කර තිබෙනවා.
