ශ්රී ලාංකික දමිළ ගීතයක් වන “අය්යෝ සාමි” ගීතය ගායනා කරන වින්ඩි ගුණතිලක, දකුණු ඉන්දියාවේ චෙන්නායි නුවර පැවති 16 වන එඩිසන් සම්මාන උළෙලේ දී (16 th Edison Awards) 2023 වසරේ ඉදිරිපත් වූ විශිෂ්ඨතම සංවේදී ගීතයට (Best Sensational Song of the Year-2023) හිමි සම්මානය හිමි කර ගෙන ෛඉයේ (26) දින රාත්රීයේ කටුනායක ගුවන් තොටුපොළ වෙත පැමිණ තිබේ.
මෙම සම්මාන උළෙල ජාත්යන්තර චිත්රපට සහ ගීත ඇගැයීම සදහා පවත්වනු ලබන අතර, මෙම සම්මාන උළෙල ඉකුත් 24 දින ඉන්දියාවේ චෙන්නායි නුවර පවත්වා තිබුණි.
මෙම සම්මාන ලබා ගන්නා අවස්ථාවට මෙම ගීතය රචනා කළ පොතුවිල් අස්මින් සහ මෙම ගීතය සදහා සංගීතය නිර්මාණය කළ සනුක වික්රමසිංහ ද එක් වී සිටියහ.
එසේම වින්ඩි ගුණතිලකගේ දෙමාපියන් වන ප්රවීණ ගායන ශිල්පී රූකාන්ත ගුණතිලක මහතා, ප්රවීණ ගායන ශිල්පිනී චන්ද්රලේඛා පෙරේරා මහත්මිය ද සනුක වික්රමසිංහගේ පියා වන සංගීතවේදී සංගීත් වික්රමසිංහ ඇතුළු විශාල පිරිසක් මෙම සම්මාන ලබා ගන්නා අවස්ථාවට සහභාගී වීම සදහා ඉන්දියාවේ චෙන්නායි නුවර වෙත ගොස් තිබුණි .
කටුනායක ගුවන් තොටුපොළේ දී ගායිකා වින්දි ගුණතිලක තම “අය්යෝ සාමි” ගීතය ජාත්යන්තර ගීත දර්ශක වල ඉහළින්ම ඔසවා තැබීමට ලොව පුරා තම රසිකයන් පළ කර තිබූ මනාප වලට ද ස්තුතිය පළ කිරීමට ද අමතක නොකළාය.
