අතුරුදහන් වූ නාවික හමුදා නිලධාරියා සොයාගැනීමේ මෙහෙයුම් සිව්වන දිනටත් ක්රියාත්මක වෙමින් පවතිනවා. අඟුලාන ප්රදේශයට ඔබ්බෙන් සිදුකළ සාමාන්ය මුර සංචාරයකින් ආපසු පැමිණෙමින් සිටියදී, පසුගිය 15 වනදින පෙරවරු 11.40ට පමණ නාවික හමුදාවට අයත් වේග ප්රහාරක යාත්රාවක් අනතුරකට ලක් වුනා. අඟුලාන පොලීසියේ සහ ප්රදේශයේ ධීවර ප්රජාවගේ සහාය ඇතිව යාත්රාවේ සිටි පුද්ගලයින් 12 දෙනාගෙන් 11 දෙනෙකු සාර්ථකව බේරා ගැනීමටයි සමත් වුනේ. ඒ සමඟම, අතුරුදන් වූ නිලධාරියා සොයා ගැනීම, යාත්රාව ගොඩගැනීම සහ සිදුවීමට අදාළ නිශ්චිත තත්ත්වයන් තහවුරු කර ගැනීම සඳහා ශ්රී ලංකා ගුවන් හමුදාව සමඟ සම්බන්ධීකරණයෙන් විශේෂිත සම්පත් යෙදවීමට නාවික හමුදාව කටයුතු කර තිබුනා. 16 වන දින අලුයම සිට දැරූ වෙහෙසකර උත්සාහයකින් අනතුරුව, නාවික හමුදා කිමිදුම්කරුවන් විසින් අදාළ යාත්රාව සාර්ථකව ගොඩගැනීමටයි සමත් වුනේ. මේ අතර, මෙම සිදුවීම පිළිබඳ මූලික විමර්ශනයක් සිදුකිරීම සඳහා විශේෂඥ මණ්ඩලයක් පත්කර තිබෙනවා.
