ව්‍යාජ විදෙස් ගමන් බලපත්‍රයක් සකස් කිරීම සඳහා ආධාර අනුබල දීම සම්බන්ධයෙන් ආගමන විගමන දෙපාර්තමේන්තුවේ නියෝජ්‍ය පාලක අත්අඩංගුවට ගෙන තිබෙනවා.
එම සැකකරු කොළඹ වංචා විමර්ශන කාර්යංශය විසින් ඊයේ අත්අඩංගුවට ගෙන ඇති බවයි වාර්තා වන්නේ.
ඉන්දියාවේ චෙන්නායි සිට මෙරටට පිටුවහල් කළ සංවිධානාත්මක අපරාධ කල්ලි සාමාජිකයෙකුගේ ඡායාරූපයට වෙනත් පුද්ගලයෙකුගේ ජීව දත්ත ඇතුළත් කළ අයදුම්පත්‍රයක් නිසි පරීක්ෂාවකින් තොරව භාරගෙන විදේශ ගමන් බලපත්‍රයක් නිකුත් කිරීමට ආධාර ලබාදී ඇති බවට මෙම සැකකරුට එල්ල වී තිබෙනවා.
අත්අඩංගුවට ගත් සැකකරු 51 හැවිරිදි මාතර ප්‍රදේශයේ පදිංචිකරුවෙක්.
මෙම සිද්ධිය සම්බන්ධයෙන් කොළඹ ප්‍රධාන මහෙස්ත්‍රාත් අධිකරණයේ විභාග වන නඩුවකට අදාළව මහේස්ත්‍රාත්වරයා විසින් පොලිස්පතිවරයාට ලබාදුන් දැනුම්දීමක් මත විමර්ශන ආරම්භ කර තිබෙනවා.
කොළඹ වංචා විමර්ශන කාර්යංශය මේ සම්බන්ධව වැඩිදුර පරීක්ෂණ සිදුකරනු ලබනවා.
