මහජන සෞඛ්ය පරීක්ෂකවරුන්ගේ සංගමය අද පෙරවරු 8.00 සිට දීපව්යාප්ත වෘත්තීය සමිති ක්රියාමාර්ගයකට පිවිසීමට තීරණය කර තිබෙනවා. ඒ කටුනායක බණ්ඩාරනායක ජාත්යන්තර ගුවන්තොටුපළේ සෞඛ්ය කාර්යාලයේ සිදුවන අනීතික ක්රියාවලට එරෙහි වීම හේතුවෙන් මහජන සෞඛ්ය පරීක්ෂක බී.එච්. මිගස්දෙනිය මහතා ස්ථානමාරු කිරීමට එරෙහිවයි. මෙම ගැටලුව සම්බන්ධයෙන් මීට පෙර බලධාරීන් දැනුවත් කළද, සෞඛ්ය අමාත්යාංශය විසින් මෙතෙක් කිසිදු විසඳුමක් ලබාදීමට කටයුතු කර නොමැති බව එම සංගමය පවසන්නේ. ඒ අනුව, සංගමයේ කෘත්යාධිකාරී මණ්ඩල තීරණයට අනුව හෙට සිට ක්රියාත්මක වන පරිදි දිවයින පුරා සියලු මහජන සෞඛ්ය පරීක්ෂකවරුන් සහ පරිපාලන මහජන සෞඛ්ය පරීක්ෂකවරුන් විසින් පරිපාලනය වෙත ලබාදෙන සියලු ආකාරයේ දත්ත සහ වාර්තා සැපයීම සම්පූර්ණයෙන්ම අත්හිටුවීමට තීරණය කර තිබෙනවා. සියලු ආකාරයේ දත්ත පද්ධති යථාවත් කිරීම අත්හිටුවීම සහ මෙම කාලසීමාව තුළ නොලැබී යන කිසිදු දත්තයක් නැවත කිසිදිනෙක දත්ත පද්ධති වෙත යථාවත් නොකිරීමටද ඔවුන් තීරණය කර තිබෙනවා. එමෙන්ම, බී.එච්. මිගස්දෙනිය මහතාගේ අත්තනෝමතික ස්ථානමාරුව වහාම අවලංගු කර, ඒ පිළිබඳව සාධාරණ පරීක්ෂණයක් පවත්වන ලෙසයි ඔවුන් බලධාරීන්ගෙන් ඉල්ලා සිටින්නේ. ඊට අමතරව, කොළඹ වරාය සෞඛ්ය කාර්යාලයේ සහ කටුනායක ගුවන්තොටුපළ සෞඛ්ය කාර්යාලයේ මහජන සෞඛ්ය පරීක්ෂක අනුමත සේවක සංඛ්යාව අඩු කිරීමට ගෙන යන උත්සාහය ද ඔවුන් හෙළා දැක තිබෙනවා. කෙසේ වෙතත්, මෙම කරුණු සම්බන්ධයෙන් සාධාරණ පරීක්ෂණයක් සඳහා තමන් පූර්ණ සහය ලබාදීමට මෙන්ම ඕනෑම අවස්ථාවක සාකච්ඡා කිරීමට සූදානම් බවද එම සංගමය වැඩිදුරටත් අවධාරණය කරනවා.
