දිට්වා සුළු කුණාටුවෙන් නායයාමට ලක්වූ කොත්මලේ රම්බොඩ වැවන්ඩන් වතුයායේ වතු කම්කරු පවුල් 25ක් මාස දෙකක කාලයක් තිස්සේ එම වතුයායේම ඉඩමක තාවකාලිකව ඉදිකරන ලද කුඩාරම්වල විවිධ දුෂ්කරතා මධ්‍යයේ පදිංචිව සිටිනවා.
දිට්වා සුළි කුණාටුව පැමිණීමත් සමග තම වත්තේ කොටසක් නායයාමත් සමග තමන් මාසයක පමණ කාලයක් පොදු ස්ථානවල සහ වතුයායේ කෝවිලේ පදිංචිව සිටි බවත් පසුව රජය මගින් අවතැන් වූ පවුල් 25කට ආරක්ෂිත ස්ථානයකට කුඩාරම් සකස් කර දුන් බවයි එම කුඩාරම්වල වෙසෙන ජනතාව කියා සිටියේ.
වැසි දිනවලදී සහ අධික සුළං තත්ත්වය පවතින කාලයේදී කුඩාරම්වල රැඳී සිටීමට නොහැකි තත්ත්වයක් උද්ගත වී ඇති බවත් දැනට රජය මගින් තමන්ට නිවාස අලුතින් ඉදිකරදෙන බවට පොරොන්දු වී ඇති බවත් එම පොරොන්දු කඩිනමින් ඉටුකිරීමට රජයේ බලධාරීන් පියවර ගත යුතු බවයි කොත්මලේ වැවන්ඩන් වතුයායේ කුඩාරම්වල වෙසෙන අවතැන් වූ ජනතාව කියා සිටියේ.
ඉදිරි දිනවලදී කොත්මලේ ප්‍රදේශයට අධික සුළං සහඅධික වැසි තත්ත්වයක් ඇතිවීමේ අවදානමක් ඇති නිසා එම අවදානමට ප්‍රථම තමන් දැනට පදිංචි කුඩාරම්වලින් ඉවත් කර වෙනත් ස්ථානයක පදිංචි කරන ලෙසයි එම ජනතාව කියා සිටියේ.
