ශ්‍රී ලංකා කාන්තා ක්‍රිකට් කණ්ඩායමේ නායිකා චමරි අතපත්තු නවතම අයි.සී.සී. කාන්තා විස්සයි20 ක්‍රීඩිකාවන් ශේණිගත කිරීම්වල කාණ්ඩ තුනෙන්ම සිය ක්‍රිකට් දිවියේ ඉහළම ස්ථාන හිමිකරගෙන තිබෙනවා. ඒ එක්සත් අරාබි එමීර් රාජ්‍යයට එරෙහිව ආසියානු කුසලාන තරගයේදී දැක්වූ විශිෂ්ට දස්කම් හේතුවෙනි. ඩුබායිහිදී පැවති එම තරගයේදී චමරි අතපත්තු එක් කඩුල්ලක් දවාගැනීමෙන් අනතුරුව නොදැවී ලකුණු 48ක් රැස්කරමින් ශ්‍රී ලංකාවට කඩුලු 9ක විශිෂ්ට ජයක් හිමිකර ගැනීමට දායක වූවා. ඒ අනුව 36 හැවිරිදි තුන් ඉරියව් ක්‍රීඩිකාව විස්සයි 20 පිතිකාරිනියන් අතර හයවැනි ස්ථානයටත්, පන්දු යවන්නියන් අතර 33වැනි ස්ථානයටත්, තුන් ඉරියව් ක්‍රීඩිකාවන් අතර තෙවැනි ස්ථානයටත් පත්ව තිබෙනවා එම ස්ථාන තුනම චමරි අතපත්තු සිය විස්සයි20 ජාත්‍යන්තර ක්‍රිකට් දිවියේ අදාළ කාණ්ඩවල මෙතෙක් ලබාගත් ඉහළම ශේණිගත කිරීම් වීම විශේෂත්වයක්. මේ වසර මුලදී පැවති අයි.සී.සී. කාන්තා විස්සයි20 ලෝක කුසලාන තරගාවලියේදීද චමරි අතපත්තු ශ්‍රී ලංකාව වෙනුවෙන් ලකුණු 172ක් රැස්කරමින් සහ කඩුලු 3ක් දවාගනිමින් දස්කම් දැක්වූවා. මේ අතර නවතම ශේණිගත කිරීම්වල ශ්‍රී ලංකා කණ්ඩායමේ තවත් ක්‍රීඩිකාවන් කිහිපදෙනෙකුද ඉදිරියට පැමිණ තිබේ. ඉමේෂා දුලානි ස්ථාන හතරකින් ඉදිරියට පැමිණ විස්සයි20 පිතිකාරිනියන් අතර 18වැනි ස්ථානයට පත්ව ඇති අතර, හර්ෂිතා සමරවික්‍රම එක් ස්ථානයකින් ඉදිරියට පැමිණ 23වැනි ස්ථානය හිමිකරගෙන තිබෙනවා. ශ්‍රී ලංකා දඟ පන්දු යවන ක්‍රීඩිකා සුගන්ධිකා කුමාරිද විස්සයි20 පන්දු යවන්නියන්ගේ ශේණිගත කිරීම්වල ස්ථාන පහකින් ඉදිරියට පැමිණ 23වැනි ස්ථානයට පත්ව ඇති බවයි දැක්වෙන්නේ. මේ අතර ඉන්දුනීසියාවට එරෙහිව කඩුලු දෙකක් දවාගත් බංග්ලාදේශ වේග පන්දු යවන ක්‍රීඩිකා මරුෆා අක්තර් ස්ථාන දෙකකින් ඉදිරියට පැමිණ විස්සයි20 පන්දු යවන්නියන් අතර 37වැනි ස්ථානයට පත්ව තිබෙනවා.
