ක්ලීන් ශ්‍රී ලංකා ජාතික වැඩසටහන පිළිබඳ ජපන් ජාත්‍යන්තර සහයෝගිතා ආයතනය හෙවත් ජයිකා ආයතනය සිය ප්‍රසාදය පළ කර තිබෙනවා.
ජනාධිපතිවරයා සමග පැවති සාකච්ඡාවකදී එහි ජ්‍යෙෂ්ඨ උප සභාපති හාරා ෂෝහෙයි මහතා පැවසුවේ, මෙම ව්‍යාපෘතිය සඳහා අවශ්‍ය මූල්‍ය සහ තාක්ෂණික සහය ලබා දීමටද සූදානම් බවයි.
ජනාධිපති අනුර කුමාර දිසානායක මහතා සහ ජපාන ජාත්‍යන්තර සහයෝගිතා ආයතනයේ ජ්‍යෙෂ්ඨ උප සභාපති හාරා ෂෝහෙයි යන මහත්වරුන් අතර හමුවක් ජනාධිපති කාර්යාලයේදී ඊයේ පැවැත්වුණා.
ක්ලීන් ශ්‍රී ලංකා ජාතික වැඩසටහන පිළිබඳ හාරා ෂෝහෙයි මහතා එහිදී සිය ප්‍රසාදය පළ කරමින් පවසා ඇත්තේ මෙම ව්‍යාපෘතිය සඳහා අවශ්‍ය මූල්‍ය සහ තාක්ෂණික සහය ලබාදීමටද සූදානම් බවයි.
මෙරට ප්‍රවාහන පද්ධතිය ප්‍රතිසංස්කරණය සහ නගර පවිත්‍රකරණ කටයුතු සඳහා ජයිකා ආයතය මගින් ලබා ගත හැකි මූල්‍ය සහ භෞතික සහය පිළිබඳද මෙහිදී සාකච්ඡාවට ලක්ව තිබෙනවා.
එමෙන්ම ශ්‍රී ලංකාවේ ණය ප්‍රතිව්‍යුහගතකරණ ක්‍රියාවලියේදී ජපානය ලබා දුන් සහය ඉදිරියේදීත් ලබා දෙන බවත්, ඉදිරියේදී අවශ්‍ය මූල්‍ය සහ තාක්ෂණික සහය අඛණ්ඩව ලබා දෙන බවත් ඔහු පවසා තිබෙනවා.
