කටාර් හි අගනුවර වන දෝහා අසල පිපිරීම් ඇසුණු බව විදෙස් මාධ්‍ය වාර්තා කළා. එම විදෙස් මාධ්‍ය වැඩිදුරටත් වාර්තා කර ඇත්තේ, එක්සත් ජනපදය, කටාර් රාජ්‍යයේ අගනුවර වන දෝහා හි පිහිටි අමෙරිකානු හමුදා කඳවුර අසල මෙම පිපිරීම් හඩ ඇසුණු බවයි. මේ අතර ඉරානයේ ඉස්ලාමීය ආරක්ෂක බළකාය පවසා ඇත්තේ, කටාර්හි අමෙරිකානු අල් උඩෙයිඩ් ගුවන් කඳවුර ඉලක්ක කර ගනිමින් පළි ගැනීමේ මිසයිල ප්‍රහාරයක් දියත් කළ බවයි. තවද ඉරාකයේ අමෙරිකානු කඳවුරු ඉලක්ක කර ගනිමින් මිසයිල මෙහෙයුමක් ආරම්භ කර ඇති බවද ඉරානයේ තස්නීම් ප්‍රවෘත්ති ඒජන්සිය වාර්තා කර තිබෙනවා. මේ අතර කටාර් එයාර්වේස් ගුවන් සමාගම සිය ගුවන් ගමන් තාවකාලිකව අත්හිටුවීම තීරණය කළා. එමෙන්ම බලපෑමට ලක් වූ ඕනෑම මගියෙකුට සහාය වීම සඳහා අදාළ බලධාරීන් සමඟ සමීපව කටයුතු කර බවද එම සමාගම දැනුම් දෙනවා. කෙසේ වෙතත් ගුවන් අවකාශය නැවත විවෘත කරණ අවස්ථාවකදී මෙහෙයුම් යළිත් ආරම්භ කර බවයි කටාර් එයාර්වේස් සමාගම පවසන්නේ. මේ අතර මගීන්ගේ සහ කාර්ය මණ්ඩලයේ ආරක්ෂාව කටාර් එයාර්වේස් සමාගමේ ඉහළම ප්‍රමුඛතාවය ලෙස සලකන බවද එම සමාගම වැඩිදුරටත් සඳහන් කර තිබෙනවා.
