ගෑස් මිල අඩු වුවහොත් පාන් ඇතුළු බේකරි නිෂ්පාදන වල මිල අඩු කිරීම සම්බන්ධයෙන් අවධානය යොමු කරන බව සමස්ත ලංකා බේකරි හිමියන්ගේ සංගමය පවසනවා.
බේකරි හිමියන් ගෑස් සහ දර භාවිතයෙන් සිය නිෂ්පාදන කටයුතු සිදු කරන අතර, මෙම තත්ත්වය හමුවේ තම සංගමය ඉදිරියේදී රැස්වී තීරණයක් ගන්නා බවයි එම සංගමයේ සභාපති එන්.කේ. ජයවර්ධන මහතා ප්‍රකාශ කළේ.
අවසන් වරට පාන් ගෙඩියක මිල රුපියල් 10කින් අඩු කරනු ලැබුවේ පිටි කිලෝවක මිල රුපියල් 15කින් අඩු කිරීමත් සමඟයි.
මේ අතර හෝටල් ආශ්‍රිත ආහාර රැසක මිල ගණන් හෙට දිනයේ සිට අඩු කිරීමට තීරණය කර ඇති බව සමස්ත ලංකා ආපනශාලා හිමියන්ගේ සංගමය පවසනවා.
එම සංගමයේ සභාපති අසේල සම්පත් මහතා පැවසුවේ එලෙස අඩු වන මිල ගණන් සම්බන්ධයෙන් හෙට දිනයේදී පාරිභෝගික ජනතාව දැනුවත් කිරීමට නියමිත බවයි.
ලිට්රෝ ගෑස් මිල අඩු කිරීමත් සමග එහි වාසිය ජනතාවට ලබා දීමේ අරමුණින් මෙලෙස මිල අඩුවන බවයි ඔහු පැවසුවේ.
