රියදුරු බලපත්‍ර ලබා ගැනීම සඳහා අවශ්‍ය වෛද්‍ය සහතික නිකුත් කිරීම වෙනුවෙන් නව ඩිජිටල් ක්‍රමවේදයක් අද හඳුන්වා දීමට නියමිතව තිබෙනවා . මෙම ක්‍රමවේදය අද සිට ක්‍රියාත්මක බවයි ජාතික ප්‍රවාහන වෛද්‍ය ආයතනයේ සභාපති මහාචාර්ය ක්ලිෆර්ඩ් පෙරේරා මහතා ප්‍රකාශ කළේ. මෙම නව ක්‍රමය ඔස්සේ ඕනෑම දුරකථන ජාලයක් හරහා වෛද්‍ය පරීක්ෂණ සඳහා වේලාවන් වෙන් කරවා ගැනීමට පුද්ගලයින්ට අවස්තාව හිමි වනවා. එම දිනය සහ වේලාව වෙන් කරවා ගැනීම සඳහා කිසිදු ගාස්තුවක් අය නොකරන බවයි සභාපතිවරයා සඳහන් කළේ. අදාල ක්‍රමය හරහා ලබා ගත හැකි වේලාවන් සංඛ්‍යාව වැඩි කිරීමට අනාගතයේදී පියවර ගන්නා බවයි සභාපතිවරයා වැඩිදුරටත් පැවසුවේ. මෙමඟින් රියැදුරු බලපත්‍ර අපේක්ෂකයන්ට වෛද්‍ය සහතික ලබාගැනීමේදී මීට පෙර පැවති අපහසුතා මඟහැරී, එම ක්‍රියාවලිය වඩාත් විධිමත් හා කාර්යක්ෂම වනු ඇති බව බලධාරීන් අපේක්ෂා කරනු ලබනවා.
