තවත් සති කිහිපයකින් ජාත්‍යන්තර මූල්‍ය අරමුදලින් ශ්‍රී ලංකාව වෙත ලබා දීමට නියමිත මූල්‍ය සහනය ලැබෙනු ඇතැයි ශ්‍රී ලංකා මහ බැංකුව අපේක්ෂා කරනවා.
ශ්‍රී ලංකා මහ බැංකුව පවසන්නේ ශ්‍රී ලංකාවේ ණය හිමියන් සමඟ සිදු කෙරෙන සාකච්ඡා මේ වන විට සාර්ථකව සිදු කෙරෙන බවයි.
මේ අනුව පසුගිය වසරේදී ජාත්‍යන්තර මූල්‍ය අරමුදල සහ ශ්‍රී ලංකාව අතර ඇති කර ගත් කාර්යමණ්ඩල එකඟතාව සාර්ථක වනු ඇතැයිද ශ්‍රී ලංකා මහ බැංකුව පවසනවා.
මේ අතර 2022 වසර සඳහා ශ්‍රී ලංකා ආර්ථිකය සියයට අටක පමණ පසු බෑමක් වාර්තා කළ හැකි බව ශ්‍රී ලංකා මහ බැංකුව පෙන්වා දෙනවා.
ශ්‍රී ලංකා මහ බැංකුව විසින් නිකුත් කරන ලද 2023 වසර සඳහා නිකුත් කළ මුදල් සහ මූල්‍ය අංශ ප්‍රතිපත්ති ප්‍රකාශයේ සඳහන් වන්නේ 2023 වසරේ දෙවැනි භාගයේ සිට ශ්‍රී ලංකා ආර්ථිකය ක්‍රමානුකූලව ප්‍රකෘති තත්ත්වයට පත්විය හැකි බවයි.
අනතුරුව එම වර්ධනය ක්‍රමානුකූලව පවත්වාගෙන යාමට හැකි වෙතැයි අපේක්ෂා කරන බවද ශ්‍රී ලංකා මහ බැංකුව අවධාරණය කර සිටිනවා.
