ලංකා ප්‍රිමියර් ක්‍රිකට් තරගාවලියේ ඊයේ පැවති තරග දෙකෙන් ජය වාර්තා කිරීමට ගෝල් ටයිටන්ස් කණ්ඩායම සහ කලම්බෝ ස්ට්‍රකර්ස් කණ්ඩායම සමත් වුණා.
ඒ ජැෆ්නා කිංග්ස් කණ්ඩායම සහ බී ලව් කැන්ඩි කණ්ඩායම පරාජයට පත් කරමින්.
ඊයේ පැවති පළමු තරගයෙන් ජැෆ්නා කිංග්ස් කණ්ඩායම කඩුළු 07න් පරාජයට පත් කිරීමට ගෝල් ටයිටන්ස් කණ්ඩායම සමත් වුණා.
එම තරගයේ පළමුවෙන් පන්දුවට පහරදුන් ජැෆ්නා කිංග්ස් කණ්ඩායමට සියලුදෙනා දැවී රැස් කරගත හැකි වූයේ ලකුණු 89ක් පමණයි.
එහිදී විශිෂ්ඨ පන්දු යැවීමක නිරත වූ කසුන් රාජිත ලකුණු 20ට කඩුළු 4ක් බිද හෙළීමට සමත් වුණා.
පිළිතුරු ඉනිම ක්‍රීඩා කළ ගෝල් ටයිටන්ස් කණ්ඩායම පන්දුවාර 13යි පන්දු 03න් අවසානයෙ කඩුළු 3ක් දැවී ලකුණු 90ක් ලබා ගනිමින් තරගය ජයග්‍රහණය කළා.
මේ අතර ඊයේ පැවති දෙවැනි තරගයෙන් බී ලව් කැන්ඩි කණ්ඩායම පරාජය කරමින් ලකුණු 09ක ජයක් වාර්තා කිරීමට කලම්බෝ ස්ට්‍රකර්ස් කණ්ඩායම සමත් වුණා.
තරගයේ පළමුවෙන් පන්දුවට පහරදුන් කලම්බෝ ස්ට්‍රකර්ස් කණ්ඩායම නියමිත පන්දුවාර 20 අවසානයේ කඩුළු 09ක් දැවී රැස් කළ ලකුණු සංඛ්‍යාව 169ක්.
පිළිතුරු ඉනිම ක්‍රීඩා කළ බී ලව් කැන්ඩි කණ්ඩායමට නියමිත පන්දුවාර 20 අවසානයේ කඩුළු 08ක් දැවී රැස් කරගත හැකි වූයේ ලකුණු 160ක් පමණයි.
