බෝ නොවන රෝග පාලනයට හා වැළැක්වීමේ සත්කාරයට ප්‍රමුඛත්වය දෙමින් ප්‍රාථමික සෞඛ්‍ය සේවාවේ නව මුහුණුවරක් සනිටුහන් කෙරෙන ආරෝග්‍යා සුවතා මධ්‍යස්ථාන දහසක් පිහිටුවීමේ ව්‍යාපෘතිය හෙට සිට ආරම්භ කෙරෙනවා. එහි පළමු ව්‍යාපෘතිය ලෙස කළුතර දකුණ සුවතා මධ්‍යස්ථානයේ ඉදිකිරීම් කටයුතු මේ වන විට ආරම්භ කර තිබෙනවා. මෙරට වත්මන් රෝහල් පද්ධතිය තුළ රෝගියෙකු, වෛද්‍යවරයෙකු හමුවීමට යන අවස්ථාවල පවතින තදබදය සහ පෝලිම් හේතුවෙන් රෝගියාගේ තත්ත්වය පිළිබද දීර්ඝ ලෙස සාකච්ඡා කර උපදෙස් ලබාදීමට වෛද්‍යවරුන්ට තිබෙන කාලය සීමිත වී තිබෙනවා. එමෙන්ම ජනතාවට ද සෞඛ්‍ය ගැටලු සම්බන්ධයෙන් ප්‍රමාණවත් කාලයක් ගනිමින් සාකච්ඡා කිරිමට හෝ වැළැක්වීමේ සෞඛ්‍ය ක්‍රමවේද පිළිබද දැනුවත් වීමට අවස්ථාව නොලැබීම ද ගැටලුවක්ව පවතිනවා. මෙම තත්ත්වය සැලකිල්ලට ගනිමින් ග්‍රාම නිලධාරී වසම් කිහිපයක් ආවරණය වන පරිදී ප්‍රජා මට්ටමින් සෞඛ්‍ය උපදෙස්, පරික්ෂණ, මග පෙන්වීම් ලබා දීමේ අරමුණෙන් ආරෝග්‍යා සුවතා මධ්‍යස්ථාන සංකල්පය හදුන්වාදීමට සෞඛ්‍ය අමාත්‍යාංශය පියවර ගෙන තිබෙනවා. රෝගාතුර වූ පසු ප්‍රතිකාර කිරීමට වඩා රෝග ඇතිවීම කල්තියා වලක්වා ගැනීම සහ සමස්ත ශාරීරික සුවතාව ප්‍රවර්ධනය කිරීම මෙහි මූලික අරමුණයි. සෑම මධ්‍යස්ථානයකටම වෛද්‍යවරයෙකු, ප්‍රජා හෙද කාර්ය මණ්ඩලයක් සහ සම්බන්ධීකරණ නිලධාරීන් මෙමඟින් අනියුක්ත කෙරෙනවා.
