එළඹෙන සතියේදී ජනාධිපතිවරයා සමග සාකච්ඡා කොට 13 වැනි ආණ්ඩුක්‍රම ව්‍යවස්ථා සංශෝධනය පූර්ණ වශයෙන් බලාත්මක කිරීමට ගෙන ඇති තීරණය සම්බන්ධයෙන් මහා සංඝරත්නයේ ස්ථාවරය ඉදිරිපත් කරන බව අස්ගිරි පාර්ශ්වයේ ප්‍රධාන ලේඛකාධිකාරි පූජ්‍ය මැදගම ධම්මානන්ද හිමියන් පවසනවා .
අස්ගිරි පාර්ශ්වයේ මහානායක හිමියන් ප්‍රමුඛ සංඝ සභාව දැනුවත් කිරීමට ජාතික සංවිධාන එකමුතුවේ නියෝජිතයින් පිරිසක් ඊයේ පැමිණි අවස්ථාවේදීයි උන්වහන්සේ මේ බව සඳහන් කර තිබුණේ .
ජාතික සංවිධාන එකමුතුවේ නියෝජිතයින් පිරිසක් ඊයේ එලෙස පැමිණ ඇත්තේ 13 වැනි ආණ්ඩුක්‍රම ව්‍යවස්ථා සංශෝධනය බලාත්මක කළහොත් රටට ඇතිවන බලපෑම පිළිබඳ අස්ගිරි පාර්ශ්වයේ මහානායක අතිපූජ්‍ය වරකාගොඩ ශ්‍රී ඥානරතන ස්වාමීන්වහන්සේ ප්‍රමුඛ කාරක සංඝ සභාව දැනුවත් කිරීමටයි .
පසුව එම නියෝජිතයින් පිරිස ගැටඹේ ශ්‍රී රාජෝප වනාරාමයට පැමිණ විහාරාධිපති පූජ්‍ය කැප්පෙටියාගොඩ සිරිවිමල හිමියන් ද බැහැදැක 13 වැනි ආණ්ඩුක්‍රම ව්‍යවස්ථා සංශෝධනය බලාත්මක කිරීමේ උත්සාහය පිළිබඳ සාකච්ඡා කර තිබුණා .
