පළාත් පාලන මැතිවරණයට කැබිතිගොල්ලෑව ප්රාදේශිය සභාව නියෝජනය කරමින් එක්සත් ජාතික පක්ෂයෙන් අපේක්ෂකත්වය ලබා සිටින පුතාට ඉන් ඉවත්වන ලෙස දන්වමින් ඡාතික ජන බලවේගයේ ආධාරකරුවන් පිරිසක් අදාළ අපේක්ෂකයාගේ පියා නිරුවත් කොට කොන්ක්රීට් කණුවක බැද පහරදීමේ පුවතක් කැබිතිගොල්ලෑව 2 කණුව ප්රදේශයෙන් වාර්තා වනවා.
මෙලෙස පහරකෑමට ලක්ව ඇත්තේ ඉහළවැව කැබිතිගොල්ලෑව ලිපිනයේ පදිංචි 62 හැවිරිදි ඒ. පියරත්න නැමැති විශ්රාමික පොලිස් නිලධාරියෙකි.
අද(27) අළුයම 2.20 ට පමණ මෙම සිදු වීම සිදුව ඇති බවයි වී නිව්ස් වාර්තාකරු පවසන්නේ.
තමන් විසින් වසර ගණනාවක් රකිමින් සිටින පොල් වගාව වල් අලින්ගෙන් බේරාගැනීම සඳහා පොල්වත්තට පැමිණි එහි තිබූ තාවකාලික නිවසේ නිදාගනිමින් සිටියදී අළුයම 2.20 ට පමන කිසියම් පුද්ගලයෙකු දොරට තට්ටු කරණු ඇසී මෙම පහරකෑමට ලක් වූ පියරත්න මහතා දෙර ඇර කවුරුන්ද යන්න විමසා තිබෙනවා.
ඒ සමගම එක්වරම ගේ ඇතුලට පැමිණි පුද්ගලයින් දෙදෙනෙක් විදුලිය විසන්ධි කර ඇති තිබෙනවා.
අනතුරුව තවත් අයෙකු පියරත්න මහතා අල්ලාගෙන සිට ඇති අතර අනතුරුව පස් දෙනෙකුගෙන් යුත් කණ්ඩායමක් පැමිණ තමන් සමගි ජන බලවේගයේ කියා පවසා ඇත.
අනතුරුව මෙම පුද්ගලයාට පහරදී නිරුවත් කොට නිවස පිටුපස ඉදිකරමින් තිබෙන ජල ටැංකියේ කොන්ක්රීට් කණුවක බැද තිබෙනවා.
එහිදී පහර දුන් පිරිස පළාත් පාලන මැතිවරණයට එක්සත් ජාතික පක්ෂයෙන් අපේක්ෂකත්වය ලබා සිටින පුතාට ඉන් ඉවත් වෙන ලෙස දන්වා මෙම පුද්ගලයා පිලිස්සීමට උත්සහ කර ඇති බවයි වාර්තා වන්නේ.
අනතුරුව පහර කෑමට ලක්වූ පුද්ගලයාගේ හඬ ඇසී අසල සිටි පිරිසක් පැමිණ ඇති අතර එහිදී පහරදීමට පැමිණි පිරිස පලා ගොස් ඇති බව පොලිසිය පවසනවා.
අනතුරුව පැමිණි පිරිස එක්වී මෙම පුද්ගලයා කැබිතිගොල්ලෑව රෝහල වෙත ගෙන ගොස් තිබෙනවා.
ඒ අනුව අප කළ විමසීමේදී කැබිතිගොල්ලෑව ප්රාදේශිය සභාව නියෝජනය කරමින් පළාත් පාලන මැතිවරණයට එක්සත් ජාතික පක්ෂයෙන් අපේක්ෂකත්වය ලබා සිටින බුද්ධික වත්තේවැව මහතා තම පියාට සිදු වූ පහරදීම පිළිබඳ මෙලෙස අදහස් දක්වා සිටියා.
අපේ තාත්තාට හතුරෝ නෑ. එයා මීට පෙර ජේ.වී.පී එකට තමයි සහය දුන්නේ. නමුත් දැන් එක්සත් ජාතික පක්ෂයේ. මේ පහරදීම සමගි ජන බලවේගයෙන් කළ එකක් නොවේ කියලයි මට වැටහෙන්නේ. මේ පහරදීම සිදු කර තිබෙන්නේ ජනතා විමුක්ති පෙරමුණෙන් (ඡාතික ජන බලවේගයේ) ආධාරකරුවන් පිරිසක් කියන එකයි අපි හැමෝම සැකකරන්නේ. මේ වගේ සිදු වීමක් යළි සිදු නොවන්න බලධාරින් වග බලාගත යුතුයි කියන දේ තමයි මට කියන්න තියෙන්නේ.
මේ පිළිබඳ වැඩි දුර පරික්ෂණ කැබිතිගොල්ලෑව පොලිසිය සිදු කරනු ලබනවා.
සජිත් ගයාන් උබේපාල – මැදවච්චය
