ලංකා ප්‍රිමියර් ලීග් ක්‍රිකට් තරඟාවලිය යටතේ ඊයේ පැවති තරග දෙකෙන් ජය ගැනීමට ගෝල් ටයිටන්ස් කණ්ඩායම සහ කලම්බෝ ස්ට්‍රයිකර්ස් කණ්ඩායම් ජය ගැනීමට සමත් වුණා.
ඒ දඹුල්ල අවුරා කණ්ඩායම සහ බී ලව් කැන්ඩි කණ්ඩයාම පරාජයට පත් කරමින්.
ඊයේ පැවති පළමු තරගයෙන් සුපිරි පන්දුවාරයේදී ජය වාර්තා කිරීමට ගෝල් ටයිටන්ස් කණ්ඩායම සමත් වුණා.
එම තරගයේ පළමුවෙන් පන්දුවට පහරදුන් ටයිටන්ස් කණ්ඩායම නියමිත පන්දුවාර 20 අවසානයේ කඩුළු 5ක් දැවී රැස් කළ ලකුණු සංඛ්‍යාව 180ක්.
එහිදී භානුක රාජපක්ෂ ලකුණු 48ක් සහ නායක දසුන් ශානක නොදැවී ලකුණු 42ක් රැස් කළා.
පිළිතුරු ඉනිම ක්‍රීඩා කළ දඹුල්ල අවුරා කණ්ඩායමද නියමිත පන්දුවාර 20 අවසානයේදී කඩුළු 7ක් දැවී ලකුණු 180ක් ලබා ගැනීම නිසා තරගය සම වූ අතර, ඒ අනුවයි සුපිරි පන්දුවාරය ක්‍රියාත්මක වූයේ.
සුපිරි පන්දුවාරයේදී පළමුවෙන් පන්දුවට පහරදුන් දඹුල්ල අවුරා කණ්ඩායම එක් කඩුල්ලක් දැවී ලකුණු 9ක් රැස් කළා.
ඊට පිළිතුරු ලෙස ගෝල් ටයිටන්ස් කණ්ඩායම ලකුණු 11ක් ලබා ගනිමින් තරගය ජයග්‍රහණය කිරීමටයි සමත් වුණේ.
මේ අතර ඊයේ පැවති දෙවැනි තරගයෙන් බී ලව් කැන්ඩි කණ්ඩායම පරදා කලම්බෝ ස්ට්‍රයිකර්ස් කණ්ඩායම ලකුණු 27ක ජයක් ලැබීමට සමත් වුණා.
එම තරගයේ පළමුවෙන් පන්දුවට පහරදුන් ස්ට්‍රයිකර්ස් කණ්ඩායම නියමිත පන්දුවාර 20 අවසානයේ කඩුළු 6ක් දැවී රැස් කළ ලකුණු සංඛ්‍යාව 157ක්.
එහිදී බාබර් අසාම් පන්දු 52දී ලකුණු 59ක් රැස් කිරීමට සමත් වුණා. පන්දු යැවීමේදී ඉසුරු උදාන ලකුණු 39ට කඩුළු 3ක් දවා ගැනීමට සමත් වුණා.
ඒ අනුව පිළිතුරු ඉනිම ක්‍රීඩා කළ බී ලව් කැන්ඩි කණ්ඩායමට පන්දුවාර 20 අවසානයේ කඩුළු 08ක් දැවී රැස් කරගත හැකි වූයේ ලකුණු 130ක් පමණයි.
එහිදී අගනා පන්දු යැවීමක නිරත වූ මතීෂ පතිරණ ලකුණු 24ට කඩුළු 3ක් බිඳ හෙළනු ලැබුවා.
