නීති විරෝධී ලෙස ඉන්ධන තොග රැස්කර සන්තකයේ තබාගත් සැකකරුවන් සිව්දෙනෙක් නුගේගොඩ, නිට්ටඹුව, නෝර්වුඩ් සහ මිනුවන්ගොඩ යන ප්රදේශවලින් අත්අඩංගුවට ගෙන තිබෙනවා.
පොලිසිය කියා සිටියේ ඊයේ(22) දහවල් කාලයේ නුගේගොඩ කොට්ඨාස අපරාධ විමර්ශන කාර්යාංශයේ නිලධාරීන් කණ්ඩායමකට ලද තොරතුරකට අනුව මහරගම, පමුණුව ප්රදේශයේදී බලපත්ර නොමැතිව පෙට්රල් ලීටර් 22ක් රැස්කර සන්තකයේ තබාගෙන සිටි සැකකරුවෙකු අත්අඩංගුවට ගෙන මහරගම පොලිස් ස්ථානය වෙත ඉදිරිපත් කර ඇති බවයි.
සැකකරු වයස අවුරුදු 44ක් පමණ වන පමුණුව ප්රදේශයේ පදිංචිකරුවෙක් බවයි පොලිසිය කියා සිටියේ.
මහරගම පොලිසිය විසින් වැඩිදුර විමර්ශන සිදු කරනු ලබනවා.
මේ අතර ඊයේ (22) සවස් කාලයේදී නිට්ටඹුව පොලිස් ස්ථානයේ නිලධාරීන් කණ්ඩායමකට ලද තොරතුරකට අනුව නිට්ටඹුව, කම්මල්පිටිය පමුණුව ප්රදේශයේ සිල්ලරබඩු වෙළෙඳ සැලක් තුළදී බලපත්ර නොමැතිව පෙට්රල් ලීටර් 146ක් රැස්කර සන්තකයේ තබාගත් සැකකරුවෙක් අත්අඩංගුවට ගෙන තිබෙනවා.
සැකකරු වයස අවුරුදු 56ක් වන පස්යාල ප්රදේශයේ පදිංචිකරුවෙක් බවයි පොලිසිය පවසන්නේ.
සිද්ධිය සම්බන්ධනේ නිට්ටඹුව පොලිසිය වැඩිදුර විමර්ශන සිදුකරනු ලබනවා.
ඩීසල් ලීටර් 565ක් රැස්කර සන්තකයේ තබාගත් තවත් සැකකරුවෙක් නෝර්වුඩ් වෙන්චර්වත්ත ප්රදේශයේදී ඊයේ(22) සවස අත්අඩංගුවට ගෙන තිබෙනවා.
නෝර්වුඩ් පොලිස් ස්ථානයේ නිලධාරීන්ට ලද තොරතුරක් මත සිදු කළ වැටලීමකදී ප්රදේශයේ වෙළෙඳ සැලක් තුළ බලපත්ර නොමැතිව තිබූ මෙම ඉන්ධන තොගය අත්අඩංගුවට ගෙන තිබෙනවා.
වයස අවුරුදු 53ක් වන නෝර්වුඩ් ප්රදේශයේම පදිංචිකරුවෙක් අත්අඩංගුවට ගෙන ඇති අතර නෝර්වුඩ් පොලිසිය විසින් වැඩිදුර විමර්ශන සිදු කරනු ලබනවා.
නීති විරෝධීව ඉන්ධන තොග රැස්කර සන්තකයේ තබාගත් සැකකරුවෙක් මිනුවන්ගොඩ පොලිසිය විසින් අත්අඩංගුවට ගෙන තිබෙනවා.
පොලිසිය කියා සිටියේ ඊයේ (22) දහවල් කාලයේදී මිනුවන්ගොඩ පොලිස් ස්ථානයේ නිලධාරීන් කණ්ඩායමකට ලද තොරතුරකට අනුව මිනුවන්ගොඩ, කීනගහලන්ද ප්රදේශයේ නිවසක් තුළ බලපත්ර නොමැතිව පෙට්රල් ලීටර් 20ක් රැස්කර සන්තකයේ තබාගෙන සිටි සැකකරුවෙක් අත්අඩංගුවට ගෙන ඇති බවයි.
සැකකරු වයස අවුරුදු 53ක් වූ මිනුවන්ගොඩ ප්රදේශයේ පදිංචිකරුවෙක් වන අතර මිනුවන්ගොඩ පොලිසිය වැඩිදුර විමර්ශන සිදු කරනු ලබනවා.
