ඊශ්‍රායල අගමැති බෙන්ජමින් නෙතන්යාහු ලබන සතියේ ධවල මන්දිරයේදී අමෙරිකානු ජනාධිපති ඩොනල්ඩ් ට්‍රම්ප් හමුවනු ඇති බව වාර්තා වනවා.
අගමැතිවරයාගේ මෙම සංචාරය පෙබරවාරි 4 වන දින සිදුවන බවත්, ට්‍රම්ප්ගේ දෙවන ධූර කාලය තුළ ධවල මන්දිරයට ආරාධනා ලැබූ පළමු විදේශීය නායකයා ඔහු බවත් නෙතන්යාහුගේ කාර්යාලය පවසනවා.
ලබන සතියේ මුලදී ඊශ්‍රායල අගමැති සමග රැස්වීමක් පැවැත්වෙන බවයි ධවල මන්දිර නිලධාරියෙකු ද තහවුරු කර ඇත්තේ.
මේ අතර මාධ්‍යවේදීන් අමතමින් ජනපති ට්‍රම්ප් පවසා තිබුණේ ඉතා ඉක්මනින් තමා හමුවීමට අගමැති නෙතන්යාහු වොෂින්ටනයට පැමිණෙන බවයි.
යුද්ධය නැවැත්වීම සඳහා ඊශ්‍රායලය සහ හමාස් අතර ගිවිසුමක් ඇති කර ගැනීමෙන් පසු ගාසා තීරයේ සති හයක ආරම්භක සටන් විරාමයක් නිරීක්ෂණය කරන අතරතුර මෙම රැස්වීම පැවැත්වීම විශේෂත්වයක්.
සටන් විරාමය සහ ප්‍රාණ ඇපකරුවන් නිදහස් කිරීමේ ගිවිසුම ප්‍රථම වරට ප්‍රකාශයට පත් කළ විට එහි ගෞරවය තමන්ට හිමි විය යුතු බවයි ජනපති ට්‍රම්ප් පැවසුවේ.
එම සටන් විරාම ගිවිසුම ක්‍රියාත්මක කළ හැකි වූයේ නොවැම්බර් මාසයේ පැවති ජනාධිපතිවරණයෙන් තමන් ජයග්‍රහණය කළ නිසා පමණක් බව ඔහු එහිදී අවධාරණය කළා.
පසුගිය සතියේ ඊජිප්තුව සහ ජෝර්දානය ගාසා තීරයෙන් පලස්තීනුවන් ගෙන්වාගත යුතු බව ට්‍රම්ප් ප්‍රකාශ කළේ ගාසා තීර තවදුරටත් කඩා දැමිය යුතු බව පවසමින්.
හමාස් සහ පලස්තීන අධිකාරිය ට්‍රම්ප්ගේ මෙම යෝජනාව හෙළා දුටු අතර, ජෝර්දානය සහ ඊජිප්තුව ද එම අදහස ප්‍රතික්ෂේප කර තිබෙනවා.
