තලවකැලේ නුවරඑළිය හරහා දිනපතා ධාවනය වන පෞද්ගලික බස් රථ හිමියන් අද(10) දින නානුඔය රදැල්ල කෙටි මාර්ගයේදී බස් රථ නතර කර මධ්‍යම පළාත් මාර්ගස්ථ ප්‍රවාහන අධිකාරියට එරෙහි විරෝධතාවයක් ආරම්භ කර තිබෙනවා.
එම මාර්ගයේ දිනකට බස් රථ 14ක් ධාවනය කරවන බවත් රදැල්ල කෙටි මාර්ගයේ ධාවනය කරන හැටන් නුවරඑළිය සුඛෝපභෝගි බස් රථ හේතුවෙන් තලවකැලේ කිරිමැටිය හරහා වටරවුම් මාර්ගයේ ධාවනය වන බස් රථවල දැඩි අසාධාරණයක් සිදු වන බවත් එම අසාධාරණය හමුවේ තම බස් රථ කර්මාන්තය සිදු කරගෙන යාමට නොහැකි නිසා ඒස ඳහා විසඳුම් ලබාදෙන ලෙස මධ්‍ය පළාත් මාර්ගස්ථ ප්‍රවාහන අධිකාරියේ බලධාරීන්ගෙන් ඉල්ලා සිටියත් එයට මෙතෙක් ප්‍රතිචාර නොදක්වා මාර්ගයේ ගමන් ගන්නා බස් රථවල ජී.පී.එස්. තාක්ෂණය සවි නොකළ බස් රථවල මගී අවසර පත්‍රය මධ්‍යම පළාත් මාර්ගස්ථ ප්‍රවාහන අධිකාරිය විසින් නැවත ලබාගැනීමට විරෝධය පාමින් මෙම විරෝධතාවය දක්වන බවයි එම මාර්ගයේ ගමන් ගන්නා පෞද්ගලික බස් රථ රියදුරන් සහ කොන්දොස්තරවරුන් පවසනවා.
තවද හැටන් නුවරඑළිය රදැල්ල කෙටි මාර්ගයේ ගමන් ගන්නා පෞද්ගලික සුඛෝපභෝගී බස් රථවලට ජී.පී.එස්. තාක්ෂණය සවි කිරීමට රුපියල් 11,000ක මුදලකුත් තලවකැලේ කිරිමැටිය හරහා වටරවුම් මාර්ගයේ ගමන් ගන්නා බස් රථවලට ජී.පී.එස්. තාක්ෂණය සවිකිරීමට රුපියල් 17,500ක මුදලක් ගෙවන ලෙසට මධ්‍යම පලාත් මාර්ගස්ථ ප්‍රවාහන අධිකාරිය මගින් තම්නට බලපෑම් කරන බවයි විරෝධතාවයේ නියැලි සිටි බස් රථ රියදුරන් සහ කොන්දොස්තරවරුන් කියා සිටියේ.
දිනකට කිලෝමීටර් 48ක දුරක් එක් ගමන් වාරයක් පමණක් ධාවනය කර තම බස් කර්මාන්තය කරගෙන යාමට නොහැකි බවත් පවසන විරෝධතාවයේ නියැලී සිටින පෞද්ගලික බස් රථ හිමියන් වැඩිදුරටත් කියා සිටින්නේ තමන් ඉදිරිපත් කර ඇති ගැටලුවලට විසඳුම් ලබාදේනනේ නම් ජී.පී.එස්. තාක්ෂණය තම බස් රථවලට සවිකරගැනීමට කිසිදු ගැටලුවක් නොවන බවයි.
අප මේ සම්බන්ධයෙන් මධ්‍යම පළාත් මාර්ගස්ථ ප්‍රවාහන අධිකාරියේ උසස් නිලධාරියෙකුගෙන් කරුණු විමසීමට උත්සාහ කළත් එය ව්‍යර්ථ වූවා.
