ගිනිගත්හේන නාවලපිටිය ප්‍රධාන මාර්ගයේ නාගස්තැන්න ප්‍රදේශයේ මාර්ගයේ දෙපස ජලපෝෂක ප්‍රදේශයට නාවලපිටිය උලපනේ ප්‍රදේශයේ පිහිටි කර්මාන්තපුරයේ පෞද්ගලික කර්මාන්ත ශාලාවක බැහැර කරන ලිපි ද්‍රව්‍ය සහ නොදිරන කැළි කසළ සම්බන්ධයෙන් සෞඛය අංශ සහ නාවලපිටිය පොලිසියේ නිලධාරීන් එක්ව විමර්ශනයක් ආරම්භ කර තිබෙනවා.
නාගස්තැන්න ප්‍රදේශයේ පදිංචිකරුවන්ගෙන් නාවලපිටිය පොලිසියට සහ පස්බාගේ කෝරලයේ ප්‍රාදේශීය සභාවේ සෞඛ්‍ය අංශ වෙත කරන ලද පැමිණිලි කිහිපයක් මත එම නිලධාරීන් ඊයේ(24) දින පස්වරුවේ එම ස්ථානයට ගොස් පරීක්ෂා කිරීමේදී එම කර්මාන්ත ශාලාවට අයත් ලියකියවිලි රැසක් සමග අපද්‍රව්‍ය විශාල ප්‍රමාණයක් කිලෝමීටර් හයක් දුරට ස්ථාන කිහිපයකට ඉතාම සූක්ෂම ලෙස බැහැර කර තිබියදී නාවලපිටිය පොලිසියේ නිලධාරීන්ට සහ සෞඛ්‍ය අංශ නිලධාරීන්ට සොයා ගැනීමට හැකිව තිබෙනවා.
නාගස්තැන්න ප්‍රදේශයේ පදිංචිකරුවන් කියා සිටින්නේ කැලි කසල බැහැර කර තිබුනේ තමන් පානීය ජලය ලබාගන්න ස්ථානවල සහ ස්නානය කරන ස්ථානවලට බවයි.
පවතින තත්ත්වයත් සමග ප්‍රදේශය පුරා දැඩි පරිසර හානියක්ද සිදුව ඇති බවත් මෙසේ තම ගම්මානය අසල පිහිටි ජල පෝෂක ප්‍රදේශයට රැගෙනවිත් බැහැර කර තිබෙන කැළිකසල ඉවත් කර තවදුරටත් එම ස්ථානයේ මෙවැනි ආකාරයට කිසිවෙකුටත් කැලි කසල බැහැර කිරීමට ඉඩ ලබානොදෙන ලෙසට කටයුතු කරන මෙන් නාවලපිටිය නාගස්තැන්න ප්‍රදේශයේ ජනතාව පස්බාගේ කෝරලයේ ප්‍රාදේශීය සභාවේ නිලධාරීන්ගෙන් ඉල්ලා සිටිනවා.
අප මේ සම්බන්ධයෙන් පස්බාගේ කෝරලයේ ප්‍රාදේශීය සභාවේ ජය නිරීක්ෂණය කිරීමට පැමිණි ප්‍රදේශීය සබා මන්ත්‍රීවරුන් කිහිප දෙනෙකුගෙන් කළ විමසුමකදී ඔවුන් කියා සිටියේ නාගස්තැන්න ප්‍රදේශයට කැළිකසළ බැහැර කළ පුද්ගලයන්ට එරෙහිව නීතිමය පියවර ගැනීමට කටයුතු කරන බවයි.
