ඉරානය සමඟ පවතින සියලුම වෙළඳ, වාණිජ සහ මූල්‍ය ගනුදෙනු තවදුරටත් දැනුම් දෙන තුරු අත්හිටුවීමට එක්සත් අරාබි එමීර් රාජ්‍යය පියවර ගෙන තිබෙනවා. ඒ ඉරාන භූමියේ සිට එක්සත් අරාබි එමීර් රාජ්‍යය දෙසට බැලැස්ටික් මිසයිල ප්‍රහාර දෙකක් එල්ල වීමට ප්‍රතිචාර වශයෙන්. සමුද්‍ර ගමනාගමනය ඉලක්ක කරගනිමින් එල්ල වූ බවට විශ්වාස කෙරෙන මෙම මිසයිල ප්‍රහාර දෙකම මුහුදට පතිත වී තිබුනා . එක මිසයිලයක් එක්සත් අරාබි එමීර් රාජ්‍යයේ භෞමික ජල සීමාව තුළටත් අනෙක ඊට පිටතත් වැටී ඇති බව එරට ආරක්ෂක අමාත්‍යාංශය තහවුරු කළා . පසුගිය මැයි මාසයෙන් පසු එක්සත් අරාබි එමීර් රාජ්‍ය භූමිය ආශ්‍රිතව වාර්තා වූ පළමු මිසයිල සිද්ධිය මෙය වනවා. හෝමුස් සමුද්‍ර සන්ධිය හරහා ගමන් කළ අබු දාබි ජාතික තෙල් සමාගමේ නෞකා කිහිපයකට ද ඉලක්කගත ප්‍රහාර එල්ල වී ඇති බවට එක්සත් අරාබි එමීර් රාජ්‍ය චෝදනා කරනවා. ඉරානයේ වාර්ෂික ආනයනයෙන් තුනෙන් එකකට ආසන්න ප්‍රමාණයක් සපයන ඩුබායි නගරය, ජාත්‍යන්තර සම්බාධක හමුවේ ඉරානයේ ප්‍රධානතම ආර්ථික ජීවන මාර්ගය ලෙස පැවතියා . මෙම වෙළෙඳ තහනම අමෙරිකානු සම්බාධකවලටත් වඩා ප්‍රබල පහරක් වනු ඇති බවයි විශ්ලේෂකයෝ පෙන්වා දෙන්නේ කෙසේ වෙතත්, ඉරාන විදේශ අමාත්‍යාංශ ප්‍රකාශක එස්මයීල් බගායි මෙම මිසයිල චෝදනා සම්පූර්ණයෙන්ම ප්‍රතික්ෂේප කර තිබෙනවා . එමෙන්ම මෙය ඉරානය පිට වරද පැටවීම සඳහා සිදුකළ ව්‍යාජ මෙහෙයුමක් විය හැකි බවටද ඉරාන පාර්ශ්වයෙන් ඉඟි පළවෙනවා.
