මන්නාරම නානාට්ටාන් ප්‍රධාන මාර්ගයේ නරුවිලිකුලම් ප්‍රදේශයේදී 10 වැනිදා සවස සිදු වූ රිය අනතුරකින් අවුරුදු හතරක් වයසැති කුඩා දරුවෙක් මියගොස් එකම පවුලේ තවත් තිදෙනෙක් බරපතල තුවාල ලබා ඇති බව මුරන්කන් පොලිසිය පවසනවා.
නරුවිලිකුලම් සිට නානාට්ටාන් දෙසට ප්‍රධාන මාර්ගයේ යතුරු පැදියකින් ගමන් ගත් එකම පවුලේ පියා, මව, අවුරුදු 04 පිරිමි දරුවෙක් සහ අවුරුදු 12ක දියණියක් මෙලෙස අනතුරට ලක්ව ඇති බවයි පොලිසිය පවසන්නේ.
එහිදී නානාට්ටාන් සිට මන්නාරම දෙසට ධාවනය වූ බට්ටා වරගයේ ලොරි රථයක යතුරු පැදිය මුහුණට මුහුණ ගැටීමෙන් මෙම අනතුර සිදුව තිබෙනවා.
අනතුරින් පසුව බරපතල තත්ත්වයේ සිටි පියා, මව සහ දරුවන් දෙදෙනා මන්නාරම රෝහලට ඇතුළත් කිරීමට පියවර ගෙන තිබෙනවා.
කෙසේ වෙතත් වයස අවුරුදු හතරක් පමණ වූ පිරිමි දරුවා එහිදී මියගොස් ඇති බවයි පොලිසිය පවසන්නේ.
බරපතල තුවාල ලැබූ මව, පියා සහ දියණිය මේ වනවිටත් මන්නාරම රෝහලේ නිවාසිකව ප්‍රතිකාර ලබමින් සිටිනවා.
අනතුරට හේතුව මෙතෙක් නිශ්චිතව අනාවරණ වී නොමැති වුවත් පොලිසිය සැක පළ කරන්නේ ලොරි රථයේ වේගය පාලනය කර ගැනීමට නොහැකිවීම හේතුවෙන් අනතුර සිදුවන්නට ඇති බවයි.
අනතුර සම්බන්ධයෙන් ලොරි රථයේ රියදුරා පොලිසිය විසින් අත්අඩංගුවට ගෙන ඇති අතර මුරුන්කන් පොලිසිය වැඩිදුර විමර්ශන සිදු කරනු ලබනවා.
