ශ්‍රී ලංකා ක්‍රිකට් ආයතනය පළමු වරට සංවිධාන කරන ලංකා ටී ටෙන් සුපර් ලීග් ක්‍රිකට් තරගාවලියේ පළමු තරගයෙන් කඩුලු 8 ක ජයක් වාර්තා කිරීමට ජැෆ්නා ටයිටන්ස් කණ්ඩායම සමත් වුණා.
ඒ හම්බන්තොට බංග්ලා ටයිගර්ස් කණ්ඩායම පරාජයට පත් කරමින්.
මහනුවර පල්ලේකැලේ ක්‍රීඩාංගනයේ පැවැති තරගයේ පළමුව පන්දුවට පහරදුන් බංග්ලා ටයිගර්ස් කණ්ඩායමට පන්දුවාර 10 අවසානයේ කඩුලු 8 ක් දැවී ලබා ගත හැකි වූයේ ලකුණු 106 ක් පමණයි.
පිළිතුරු ලෙස ටයිටන්ස් කණ්ඩායම පන්දුවාර 8 යි එක් පන්දුවක් අවසානයේ කඩුලු 2 ක් පමණක් දැවී ජයග්‍රාහී ඉලක්කය සපුරා ගත්තා.
ටොම් කොහ්ලර්-කැඩ්මෝර් පන්දු 21 කින් ලකුණු 57 ක් නොදැවී රැස් කළේ හයේ පහර 4 ක් හා හතරේ පහර 6 ක් සමගින්.
පළමුව පන්දුවට පහරදුන් බංග්ලා ටයිගර්ස් කණ්ඩායම වෙනුවෙන් දසුන් ශානක පන්දු 17 කින් ලකුණූ 51 ක් ලබා ගත්තා. ඒ, හයේ පහර 5 ක් හා හතරේ පහර 4 ක් සමගින්.
මේ අතර තරගාවලියේ දෙවන තරගයට වර්ෂාවෙන් බාධා එල්ල වීම හේතුවෙන් එය අතහැර දැමීමට තරග තිරකවරුන් තීරණය කළා.
එම තරගය පැවැත්වුනේ නුවරඑළිය කිංස් සහ කලම්බු ජගුවාර්ස් කණ්ඩායම් අතරයි .
කාසියේ වාසිය දිනු ජගුවාර්ස් කණ්ඩායමේ ආරාධනයෙන් පළමුව පන්දුවට පහර දුන් කිංස් කණ්ඩායම පන්දුවාර 06 ක් අවසානයේ එක් කඩුල්ලක් දැවී ලකුණු 79 ක් රැස් කර සිටියදී වර්ෂාවෙන් එල්ල වූ බාධා හේතුවෙන් තරගය නතර කිරීමට සිදු වුණා.
එමෙන්ම මෙම තරගාවලියට අදාළ තුන්වන තරගයද ඊයේ පැවැත්වුනේ කැන්ඩි බෝල්ට් හා ගෝල් මාර්වල්ස් යන කණ්ඩායම් අතරයි .
එම තරගයෙන් කඩුලු 7 ක ජයක් වාර්තා කිරීමට මහීෂ් තීක්ෂණගේ නායකත්වයෙන් යුත් මාර්වල්ස් කණ්ඩායම සමත් වුණා.
තරගයේ පළමුව පන්දුවට පහරදුන් බෝල්ට්ස් කණ්ඩායම නියමිත පන්දුවාර 10 අවසානයේ කඩුලු 5 ක් දැවී ලබාගත් ලකුණු සංඛ්‍යාව 100 ක් .
පිළිතුරු ඉනිම ක්‍රීඩා කළ මාර්වල්ස් කණ්ඩායම පන්දුවාර 7 යි පන්දු 4 ක් අවසානයේ කඩුලු 3 ක් පමණක් දැවී ජයග්‍රාහී ඉලක්කය පසු කළා.
