මෙරට තාක්ෂණික හා වෘත්තීය අධ්‍යාපන පුහුණු ක්ෂේත්‍රය බලගැන්වීම සඳහා වන ඉදිරි සහයෝගීතාවන් පිළිබඳ සාකච්ඡාවක්, අග්‍රාමාත්‍ය ආචාර්ය හරිනි අමරසූරිය මෙනෙවිය සහ එක්සත් අරාබි එමීර් රාජ්‍යයේ ඉහළ පෙළේ නියෝජිත පිරිසක් අතර පාර්ලිමේන්තු සංකීර්ණයේදී පැවැත්වුණා. දේශීය හා විදේශීය වෙළඳපොළේ නැගී එන කර්මාන්ත සඳහා අවශ්‍ය කුසලතාපූර්ණ ශ්‍රමිකයන් පිරිසක් බිහිකිරීම මෙහි ප්‍රධාන අරමුණ වනවා. එහිදී, වත්මන් රජය විසින් ක්‍රියාත්මක කරනු ලබන අධ්‍යාපන ප්‍රතිසංස්කරණ පිළිබඳව කරුණු පැහැදිලි කළ අග්‍රාමාත්‍යවරිය, වෘත්තීය අධ්‍යාපන මාර්ග පද්ධතියක් හඳුන්වාදීමට පියවර ගෙන ඇති බව ද සඳහන් කළා. තරුණ ප්‍රජාවට දේශීය මෙන්ම විදේශීය රැකියා වෙළඳපොළ ජයගත හැකි පරිදි, නවීන ලෝකයේ ඉල්ලුමට සරිලන පරිදි තාක්ෂණික හා වෘත්තීය අධ්‍යාපනය යාවත්කාලීන කිරීමටත්, ඒ වෙනුවෙන් ආයෝජනය කිරීමටත් රජය කැපවී සිටින බවයි අග්‍රාමාත්‍යවරිය වැඩිදුරටත් අවධාරණය කළේ. රජය ගෙන යන මෙම වැඩපිළිවෙළ ඇගයීමට ලක් කළ එක්සත් අරාබි එමීර් රාජ්‍යයේ නියෝජිත පිරිස, මෙරට වෘත්තීය අධ්‍යාපන ක්ෂේත්‍රයේ සංවර්ධනය උදෙසා ආයෝජනය කිරීමට සහ සහාය දැක්වීමට සිය කැමැත්ත පළ කර තිබෙනවා.
එහිදී දෙරටටම වැදගත් වන උපායමාර්ගික ක්ෂේත්‍රයන්හි ඇති ආයෝජන අවස්ථා වෙත අවධානය යොමු කරන ලෙස ද අග්‍රාමාත්‍යවරිය නියෝජිත පිරිසට ඇරයුම් කර තිබෙනවා.
