එළඹෙන ජූනි පළවෙනිදා සිට බලපැවැත්වෙන පරිදි තරග කොන්දේසි 3 ක් සංශෝධනය කිරීමට ජාත්‍යන්තර ක්‍රිකට් කවුන්සිලය තීරණය කර තිබෙනවා.
ඒ සදහා පිරිමි සහ කාන්තා ක්‍රිකට් කමිටු විසින් ලබා දුන් නිර්දේශ ජාත්‍යන්තර ක්‍රිකට් කවුන්සිලයේ ප්‍රධාන විධායක කමිටුව විසින් අනුමත කර ඇති බවයි එම කවුන්සිලය නිවේදනය කළේ.
ඒ අනුව ඉදිරියේදී පිටියේ විනිසුරුවන් විසින් තෙවන විනිසුරුට යම් තීරණයක් ලබා දීමට යොමු කිරීමේදී ඊට අදාළව පිටියේ විනිසුරුගේ මතය ප්‍රකාශ කිරීමක් අවශ්‍ය නොවන බවට තීරණය කර තිබෙනවා.
මේ අතර අධි අවදානම් සහිත අවස්ථාවලදී හිස් ආවරණ පැළදීම අනිවාර්ය කිරීමටයි කටයුතු කර ඇත්තේ. ඒ අනුව පිතිකරුවන් වේගපන්දු යවන්නන්ට මුහුණ දෙන අවස්ථාවන්හිදි, කඩුරකින්නන් කඩුල්ල අසලට පැමිණ කඩු`ඵ රැකීමේදී සහ කඩුල්ල ඉදිරිපස සිට පිතිකරු ආසන්නයේ පන්දු රකිමින් සිටියදී හිස් ආවරණ පැළදීම අනිවාර්ය වනවා.
මේ අතර නිපන්දුවකින් පසුව ලබාදෙන නිදහස් පහරට අදාළ නීති ද සංශෝධනය කිරීමටයි කටයුතු කර ඇත්තේ. එහිදි නිදහස් පහරට අදාළ පන්දුවේදී පිතිකරුවෙකු පන්දුව කෙලින්ම කඩුල්ලේ වැදීමෙන් දැවී ගියද එම පන්දුව සදහා ලබා ගන්නා ලකුණු පිතිකරුවාට හිමිවනවා.
