අලවතුගොඩ, පල්ලේගම, ඇල්ලේකඩේ ප්රදේශයේ නිවසක රාත්රී කාලයේ තනිව සිටි 26 හැවිරිදි විවාහක කාන්තාවක ඝාතනය කිරීමේ සිද්ධිය සම්බන්ධයෙන් පුද්ගලයෙක් අත්අඩංගුවට ගෙන තිබෙනවා.
මෙලෙස සැකපිට අත්අඩංගුවට ගෙන ඇත්තේ යුද හමුදාවේ සක්රීය සේවයේ නියුතු පුද්ගලයකු බවයි පොලිසිය පවසන්නේ.
කාන්තාවගේ සැමියා රාත්රී මළගෙදරක ගොස් සිටියදී ඉතා අභිරහස් ලෙස මෙම කාන්තාව ඝාතනය කොට එම නිවස අසල වෙල් යායක මඩ වගුරක දමා තිබියදී ප්රදේශවාසීන් විසින් ඊයේ දහවල් සොයා ගැනුණා.
එලෙස ඝාතනයට ලක්ව තිබුණේ ධනුකා මධුවන්ති ජයතිලක නම් 26 හැවිරිදි කාන්තාවක්.
මහත් අභිරහසක් වූ මෙම ඝාතනය සම්බන්ධයෙන් සැකකරුවෙකු හෝ අත්අඩංගුවට ගැනීමට අලවතුගොඩ පොලීසියට උපකාරී වී ඇත්තේ පොලිස් නිල සුනඛයෙක්.
ඝාතනය සිදු වූ ස්ථානයේ සිට කිලෝමීටර් තුනක් පමණ පොලිස් නිල සුනඛයා ගමන් කිරීමෙන් අනතුරුව අත්අඩංගුවට ගත් සැකකාර යුද හමුදා නිලධාරියාගේ නිවසේ කාමරයටම ගොස් හඳුනාගත් බව පොලිසිය කියා සිටියා.
අත්අඩංගුවට ගත් සැකකරු 38 හැවිරිදි වියේ පසුවන අතර ඔහු හමුදා සේවයේ සිටියදී වෙඩි වැදී තුවාල සිදුවීම හේතුවෙන් යුද හමුදාවේ සැහැල්ලු රාජකාරිවල නිරතව සිටි අයෙක්.
එමෙන්ම ඔහු අවස්ථා කිහිපයකදීම මෙම කාන්තාවට විවිධ යෝජනා සිදු කොට ඇති බවට ද පොලිස් විමර්ශනවලදී අනාවරණය වී වුණා.
ඝාතනයට ලක්වූ කාන්තාවගේ සැමියා රාත්රී කාලයේ අවමගුල් ගෙදරකට ගොස් ආපසු පැමිණි අවස්ථාවේදී බිරිඳ නිවසේ නොමැති බව දැක ඒ බව සොයා බැලීමේදී නිවසට මීටර් 100 ක් පමණ දුරකින් ඇති වෙල්යායක මඩ ගොහොරුවක ඔබා තිබියදී ඇයගේ මළ සිරුර ප්රදේශවාසීන්ට හමුව තිබුණා.
මියගිය කාන්තාවගේ මළ සිරුර සම්බන්ධයෙන් මහේස්ත්රාත් පරීක්ෂණය සිදුකිරීමට නියමිතව ඇති අතර අලවතුගොඩ පොලිසිය මේ සම්බන්ධ වැඩිදුර විමර්ශන සිදුකිරීමට නියමිතයි.
