මෝදර, මට්ටක්කුලිය, ‘රන්දිය උයන‘ නිවාස සංකීර්ණය අසලදී ඊයේ රාත්‍රියේ වෙඩිතැබීමක් සිදුව තිබෙනවා.
ත්‍රීරෝද රථයකින් පැමිණි නාඳුනන පුද්ගලයන් දෙදෙනෙකු විසින් රිවෝල්වර් වර්ගයේ ගිනි අවියකින් අදාළ වෙඩි තැබීම සිදුකර ඇති බවයි පොලිසිය පවසන්නේ.
වෙඩි වැදීමෙන් තුවාල ලැබූ 42 හැවිරිදි පුද්ගලයෙකු ප්‍රතිකාර සඳහා කොළඹ ජාතික රෝහලට ඇතුළත් කෙරුණා.
තුවාලකරු රෝහල් ගත කිරීමෙන් අනතුරුව මියගොස් ඇති බවයි පොලිසිය පවසන්නේ.
මෙලෙස වෙඩි ප්‍රහාරයට ලක්ව මියගොස් ඇත්තේ සෙන්දිල් ශන්මුගම් දුෂ්‍යන්ත් හෙවත් බඩා රංජි නමැත්තෙකි.
පොලිසිය සැක පළ කරන්නේ පාතාල කල්ලි දෙකක් අතර කාලයක සිට පවතින ආරවුලක් හේතුවෙන් මෙම වෙඩි තැබීම සිදුවන්නට ඇති බවටයි.
පොලිසිය පවසන්නේ මෙලෙස ඝාතනයට ලක්වූ බඩා රංජි නමැත්තා දැනට ඉන්දියාවට පළාගොස් සිටින පූකුඩු කන්නා නමැති පාතාල සාමාජිකයාගේ සමීපතමයෙකු බවයි.
දැනට බන්ධනාගාරගතව සිටින කංජිපානි ඉම්රාන්ගේ පියාට තියුනු ආයුධවලින් පහරදීමේ සිද්ධියටද ඝාතනයට ලක්වූ බඩා රංජි නමැත්තා සම්බන්ධ අයෙක් බවයි පොලිසිය වැඩිදුරටත් පවසන්නේ.
ඝාතනය සම්බන්ධයෙන් වැඩිදුර විමර්ශන මිහිජය සෙවණ පොලිසියේ අපරාධ විමර්ශන අංශය විසින් සිදු කරනු ලබනවා.
