බොරලැස්ගමුවේදී පුද්ගලයෙකු වෙඩි තබා ඝාතනය කිරීමේ සිද්ධිය සඳහා යොදාගත් යතුරුපැදිය මහරගම පොලීසිය විසින් සොයාගෙන තිබෙනවා. ඒ පන්නිපිටිය මහල්වරාව පිහිටි විහාරස්ථානයක් අසල වෙල්යායක දමා ගොස් තිබියදීයි.
මහරගම පොලීසියේ ප්‍රජා පොලිස් ඒකකයේ ස්ථානාධිපතිට ලැබුණු තොරතුරක් මත මෙම යතුරුපැදිය සොයා ගැනීමට පොලීසිය සමත්ව තිබෙනවා. ඊයේ රාත්‍රියේදී බොරලැස්ගමුව මාලනී බුලත්සිංහල මාවත ප්‍රදේශයේදී පුද්ගලයෙකු වෙඩි තබා ඝාතනය කෙරුණා.
74 හැවිරිදි වියේ පසුවූ එම පුද්ගලයා නිවසේ රැඳි සිටියදී යතුරුපැදියකින් පැමිණි පුද්ගලයින් දෙදෙනෙකු විසින් මෙම වෙඩි තැබීම සිදුකර ඇති බවටයි අනාවරණය වුනේ. වෙඩි ප්‍රහාරයෙන් ජීවිතක්ෂයට ලක්වූ පුද්ගලයා කොස් මල්ලි නැමැති සංවිධානාත්මක අපරාධකරුගේ මුදල් අයකැමි ලෙස කටයුතු කළ අයෙකු බවද පොලීසිය පවසනවා. මෙම වෙඩිතැබීම පාතාල කල්ලි සාමාජිකයෙකු ලෙස සැලකෙන ‘දෙහිවල සැන්ඩෝ‘ නමැත්තා විසින් බවටයි මේ වන විට අනාවරණය වී ඇත්තේ.
