හැටන් පොලිස් කොට්ඨාසයට අයත් ගිනිගත්හේන පොල්පිටිය පොලිස් ස්ථානය මහජන ආරක්සක අමාත්‍ය ආනන්ද විජේපාල මහතාගේ ප්‍රධානත්වයෙන් සහ පොලිස්පති නීතිඥ ප්‍රියන්ත වීරසුරිය මහතාගේ සහභාගිත්වයෙන් අද(06) පස්වරුවේ විවෘත කෙරුණා.
පොල්පිටිය පොලිස් ස්ථානය තිබූ ස්ථානයේ ඉඩ ප්‍රමාණවත් නොවීම හේතුවෙන් බෝඩ්ලන්ඩ් ජල විදුලි බලාගාරය ඉදිකිරීමේදී එහි කොන්ත්‍රාත්කාර චීන සමාගමේ ඉංජිනේරුවන් කාර්යාලයක් වශයෙන් පවත්වාගෙන ගිය පොල්පිටිය මංසන්ධියේ පිහිටි ගොඩනැගිලි සහ ඉඩම පොලිස් දෙපාර්තමේන්තුව වෙත පවරා ගැනීමෙන් අනතුරුව එම ගොඩනැගිලි පොලිස් ස්ථානයක් වශයෙන් නවීකරණය කිරීමෙන් පසු පොලිස් ස්ථානය විවෘත කරනු ලැබුවා.
පොල්පිටිය පොලිස් බලප්‍රදේශයේ ග්‍රාම සේවා වසම් හතකට අයත් පවුල් පවුල් 2465ක සාමාජිකයන් 7569 දෙනෙකු පොල්පිටිය පොලිසිය මගින් අවාරණය කෙරෙනවා.
පොල්පිටිය පොලිස් ස්ථානය විවෘත කිරීමෙන් අනතුරුව අමාත්‍යවරයා, පොලිස්පතිවරයා සහ මන්ත්‍රීවරයා විසින් පොලිස් ස්ථානයේ රුක් රෝපණ වැඩසටහනක්ද දියත් කරනු ලැබුවා.
මෙම උත්සවයේදී පොල්පිටිය පොලිස් බලප්‍රදේශයේ ඉකුත් වසරේ අපොස සාමාන්‍ය පෙළ විභාගයෙන් විශිෂ්ඨ ලෙසස මත් සිසු සිසුවියන් සිව්දෙනෙකුට ආරාධිතයන් විසින් පාසල් උපකරණ කට්ටලද බෙදාදෙනු ලැබුවා.
පොලිස් ස්ථානය විවෘත කිරීමේ අවස්ථාවට නුවරඑළිය දිස්ත්‍රික් පාර්ලිමේන්තු මන්ත්‍රී මංජුල සුරවීරආරච්චි, නුවරඑළිය දිසාව භාර නියෝජ්‍ය පොලිස්පති ප්‍රියන්ත චන්ද්‍රසිරි, හැටන් කොට්ඨාසභාර ජ්‍යෙෂ්ඨ පොලිස් අධිකාරි ප්‍රදීප් වීරසේකර, පොල්පිටිය පොලිසියේ ස්ථානාධිපති පොලිස් පරීක්ෂක උපුල් කුමාර මහතා ඇතුළු හැටන් පොලිස් කොට්ඨාසයේ සියලුම ස්ථානාධිපතිවරුන් පැමිණ තිබෙනවා.
මෙම උත්සවය අවසානයේ ආරාධිතයන් වෙනුවෙන් හැටන් කොට්ඨාසභාර පොලිස් අධිකාරිවරයා විසින් අමාත්‍යවරයාට, පොලිස්පතිවරයාට සහ මන්ත්‍රීවරයාට සිහිවටන ඵලකද ප්‍රදානය කෙරුණා.
