කොත්මලේ, රම්බඩගම ආසන්නයේ විශාල නායයෑමක් සිදුව ඇති බවට වාර්තා වනවා.
මෙම නායයෑම සුලු වශයෙන් පසුගිය 27 වනදා රාත්‍රීයේ ආරම්භ වී ඇති අතර ඊයේ දින වනවිට සම්පූර්ණයෙන්ම නායයාම සිදුව ඇති බවයි වාර්තා වන්නේ.
නුවරඑළිය – පූඬළුඔය මාර්ග දෙක අතර රම්බඩගම ගම්මානය මැද කොටස මෙලෙස සම්පූර්ණයෙන්ම නායගොස් ඇති බවයි අණාවරණය වන්නේ.
නායයාමෙන් මිය ගිය පිරිස පිළිබඳ නිශ්චිත තොරතුරු මේ වන තෙක් අනාවරණය කරගෙන නැහැ.
කෙසේවෙතත් මේ වනවිටත් එම ප්‍රදේශයට විදුලිය නොමැති අතර, දුරකථන සංඥා සියල්ලද ක්‍රියා විරහිත වී තිබෙනවා.
මේ අතර වරකාපොළ පොලිස් වසමේ තුල්හිරිය, මොන්රෝවියා වත්ත ප්‍රදේශයේ නායයාමක් සිදුව තිබෙනවා.
නායයාමෙන් පුද්ගලයින් 21 දෙනෙකු පමණ අතුරුදහන්ව ඇති බවයි මේ වන විට වාර්තා වන්නේ.
කෙසේවෙතත් වරකාපොළ පොලීසිය අතුරුදන් පුද්ගලයන් සෙවීමේ මෙහෙයුම් ආරම්භ කර තිබෙනවා.
අලවතුගොඩ පොලිස් වසමේ අංකුඹුර ප්‍රදේශයේද දරුණු නායයෑමක් සිදුව තිබෙනවා.
පොලීසිය සඳහන් කළේ, අංකුඹුර – අලවතුගොඩ මාර්ගයේ රඹුක්ඇළ ප්‍රදේශයේ නායයෑම සිදුව ඇති බවයි.
නායයෑමෙන් පුද්ගලයින් අවතැන්වීම් හා ජීවිත හානි වාර්තා වී ඇත්ත මෙතෙක් ඒ පිළිබඳ නිශ්චිත තොරතුරක් වාර්තා වී නොමැති බවයි පොලීසිය සඳහන් කලේ.
එම ගම්මානයේ සිටි පිරිසක් අතුරුදන් වී ඇති බවටද වාර්තා වනවා.
මේ වනතෙක් සහන කණ්ඩායම්වලට හෝ එම ස්ථානයට ළඟාවීමට හැකිවී නොමැති බවද අප වාර්තාකරු සඳහන් කලා.
