පළාත් පාලන මැතිවරණය සඳහා නාම යෝජනා කැඳවීමේ නිවේදනය අද දිස්ත්‍රික් තේරීම් භාර නිලධාරීන් වෙත නිකුත් කිරීමට නියමිතයි.
මැතිවරණ කොමිසමේ සභාපතිවරයා ඒ බව සඳහන් කර තිබෙනවා.
මේ අතර කඩා වැටුණු රට ජනාධිපති රනිල් වික්‍රමසිංහ මහතා විසින් යථා තත්ත්වයට පත් කරගෙන යන අවස්ථාවේදී එකිනෙකාගේ පටු දේශපාලන අරමුණු වෙනුවෙන් නැවත රට විනාශ කිරීමට ඉඩ නොදෙන බව එක්සත් ජාතික පක්ෂයේ සභාපති, පාර්ලිමේන්තු මන්ත්‍රී වජිර අබේවර්ධන මහතා පවසනවා.
විපක්ෂය කියන පරිද්දෙන් අති විශාල මුදල් ප්‍රමාණයක් මුද්‍රණය කර මෙම මොහොතේ ඡන්දයක් පැවැත්වුවහොත් ජනතාව කබලෙන් ලිපට වැටෙනු ඇතැයි ද වජිර අබෙිවර්ධන මන්ත්‍රීවරයා පෙන්වා දෙනවා.
රටේ තරුණ තරුණියන් ඉල්ලා සිටි සිස්ටම් චේන්ජ් වෙනස ක්‍රියාත්මක කිරීමට ජනාධිපතිවරයා එකඟ වී ඇතත්, විපක්ෂය ඊට පරිබාහිරව යමින් තවමත් පැරැණි වැඩපිළිවෙලේ සිටම කටයුතු කරමින් සිටින බවද, පාර්ලිමේන්තු මන්ත්‍රී වජිර අබෙිවර්ධන මහතා සඳහන් කරනවා.
සිරිකොත පක්ෂ මූලස්ථානයේ පැවැති මාධ්‍ය සාකච්ඡාවට එක්වෙමින් වජිර අබේවර්ධන මහතා මේ බව කියා සිටියා.
මේ අතර පළාත් පාලන ඡන්ද විමසීම පැවැත්වීමේ කටයුතු අත්හිටුවීමේ රිට් ආඥාවක් මැතිවරණ කොමිසම වෙත නිකුත් කරන ලෙස ඉල්ලා ශ්‍රේෂ්ඨාධිකරණයට පෙත්සමක් ඉදිරිපත් වී තිබෙනවා.
විශ්‍රාමික යුද්ධ හමුදා කර්නල්වරයෙකු වන ඩබ්ලිව්. එම්. ආර්. විජේසුන්දර මහතා විසින් එම පෙත්සම ගොනු කර තිබුණා.
පෙත්සමේ වගඋත්තරකරුවන් ලෙස මැතිවරණ කොමිසමේ සභාපති නීතීඥ නිමල් පුංචිහේවා මහතා ඇතුළු එහි සමාජිකයින්, අග්‍රාමාත්‍යවරයා, මුදල් අමාත්‍යාංශයේ ලේකම්වරයා, නීතිපතිවරයා ඇතුළු පිරිසක් නම් කර තිබෙනවා.
කෙසේ වෙතත් පෙත්සම්කරු පවසන්නේ පළාත් පාලන මැතිවරණය පැවැත්වීමට අදාළව දැරීමට සිදුවන වියදම පිළිබඳ තමන් තොරතුරු දැනගැනීමේ අයිතිය පිළිබඳ පනත යටතේ මැතිවරණ කොමිසමෙන් විමසීමක් කළ බවයි.
ඒ අනුව අදාළ මැතිවරණය පැවැත්වීම සඳහා රුපියල් බිලියන 10 ක පමණ මුදලක් වැය වන බවට මැතිවරණ කොමිසම විසින් තමන්ට දැනුම් දුන්නේ බවද පෙත්සම්කරු පවසනවා.
රටේ බරපතල ආර්ථික අර්බුදයක් පවතින අවස්ථාවක මෙන්ම ජාත්‍යන්තර මූල්‍ය අරමුදල විසින් බරපතළ කොන්දේසි ද පනවා තිබෙන මෙම අවස්ථාවේ මැතිවරණයක් පැවැත්වීම සුදුසු නොවන බවට සමාජය තුළ මතයක් නිර්මාණය වී ඇති බව පෙන්වා දෙන පෙත්සම්කරු පළාත් පාලන ආයතනවල මේ වන විට සභිකයින් 8711 ක් සිටින අතර එම සංඛ්‍යාව තුනෙන් එකක් දක්වා අඩු කළ යුතු බවට සාකච්ඡාවක් මතුවී තිබෙන බවද පෙන්වා දී තිබෙනවා.
මෙම තත්වය යටතේ පළාත් පාලන මැතිවරණය පැවැත්වීම තුළින් රටට හෝ මහජනතාවට කිසිදු යහපතක් අත් නොවන බව පෙන්වා දෙන පෙත්සම්කරු, එම මැතිවරණ කටයුතු සිදු කිරීම වැළැක්වීමේ රිට් ආඥාවක් මැතිවරණ කොමිසමට නිකුත් කරන ලෙසත් සිය පෙත්සමෙන් ඉල්ලා තිබෙනවා.
