අද දිනයේ දී බස්නාහිර, සබරගමුව, වයඹ සහ ගාල්ල, මාතර දිස්ත්‍රික්කවල සවස් කාලයේදී හෝ රාත්‍රී කාලයේදී ස්ථාන ස්වල්පයක වැසි හෝ ගිගුරුම් සහිත වැසි ඇති විය හැකි බව කාලගුණ විද්‍යා දෙපාර්තමේන්තුව පවසනවා.
මේ අතර මඩකලපුව, අම්පාර සහ හම්බන්තොට දිස්ත්‍රික්කවල වෙරළබඩ ප්‍රදේශවලට සිහින් වැසි වාර කිහිපයක් ඇති විය හැකි බවද එම දෙපාර්තමේන්තුව කියා සිටියා.
එමෙන්ම ගිගුරුම් සහිත වැසි සමග ඇතිවිය හැකි තාවකාලික තද සුළං සහ අකුණු මගින් සිදු විය හැකි අනතුරු අවම කර ගැනීමට අවශ්‍ය ආරක්ෂිත පියවර අනුගමනය කරන ලෙසයි එම දෙපාර්තමේන්තුව ජනතාවගෙන් ඉල්ලා සිටින්නේ.
මේ අතර පවතින තද වැසි සහිත කාලගුණික තත්වයෙන් දිවයිනේ දිස්ත්‍රික්ක දෙකක නාය යාමේ අවධානමක් මතුව ඇති බව ජාතික ගොඩනැගිලි පර්යේෂණ සංවිධානය පවසනවා.
කුරුණෑගල සහ රත්නපුර යන දිස්ත්‍රික්කවල මෙම අවධානම මතුව ඇති බවයි එම සංවිධානය සදහන් කළේ.
එම ප්‍රදේශයන් හි කදුකර හා බෑවුම් ප්‍රදේශවල ජිවත් වන ජනතාව නාය යාම් ලක්ෂණ සම්බන්ධයෙන් විමසිල්ලෙන් සිටිය යුතු බවටයි ගොඩනැගිලි පර්යේෂණ සංවිධානයේ ජේ්‍යෂ්ඨ භූ විද්‍යාඥ වසන්ත සේනාධීර මහතා වැඩිදුරටත් කියා සිටියේ.
මේ අතර පවතින අයහපත් කාලගුණය හේතුවෙන් ගාල්ල – යක්කලමුල්ල ප්‍රධාන මාර්ගයට පස් කන්දක් කඩා වැටී අවහිර වී තිබෙනවා.
යක්කලමුල්ල නගරයේ රජයේ බැංකුවක් අසල පිහිටා ඇති පස් කන්දක් අද සවස මෙලෙස මහා මාර්ගයට කඩා වැටීම හේතුවෙනුයි මාර්ගය අවහිර වී ඇත්තේ.
පොලිසිය පැවසුවේ ගාල්ල සිට යක්කලමුල්ල දක්වාත්, යක්කලමුල්ලේ සිට ගාල්ල දක්වාත් ගමන් ගන්නා වාහන විකල්ප මාර්ග ඔස්සේ ධාවනය කිරීමට පියවර ගන්නා ලෙසයි.
කෙසේ වෙතත් මේ වන විටත් එම පස් කන්ද ඉවත් කිරීමට පියවර ගනිමින් සිටින බවයි ගාල්ල දිස්ත්‍රික් ආපදා කළමනාකරණ ඒකකය කියා සිටියේ.
