මිලි මීටර් නවය වර්ගයේ නවීන පන්නයේ පිස්තෝල ගිනි අවියක් සමග අත්අඩංගුවට ගත් වාහන අලුත්වැඩියා ස්ථානයක හිමිකරුවකු රක්ෂිත බන්ධනාගාර ගත කිරීමට කඩුවෙල මහේස්ත්රාත් අධිකරණය නියෝග කර තිබෙනවා.
ටෙන්ඩර් මගින් රජයේ වාහන අළුත්වැඩියා කටයුතු සඳහා භාර ගන්නා ස්ථානයක හිමිකරුවකු වන සැකකරු අදාළ ගිනි අවිය සමග බස්නාහිර දකුණ අපරාධ කොට්ඨාශය විසින් අත්අඩංගුවට ගෙන තිබුණා.
අළුත්වැඩියාව සදහා රැගෙන ආ විදුලිබල මණ්ඩලයට අයත් රථයක් තුළ තිබී එහි සේවකයෙකුට මෙම ගිනි අවිය හමුවී ඇති අතර පසුව එය මාස අටක පමණ කාලයක් මෙම සැකකරු සතුව තිබී ඇති බවට විමර්ශනවලදී අනාවරණය වූ බව සැකකරු අධිකරණයට ඉදිරිපත් කරමින් බස්නාහිර දකුණ අපරාධ කොට්ඨාශය ප්රකාශ කළා.
මෙම ගිනි අවිය නවීන පන්නයේ ගිනි අවියක් වන බැවින් ඒ පිළිබඳව විමර්ශන කටයුතු සිදු කර යම් අපරාධයක් සදහා එය භාවිත කර ඇත්ද යන්න පිළිබඳව අධිකරණය වෙත කරුණු ඉදිරිපත් කරන ලෙස එහිදී කඩුවෙල මහේස්ත්රාත් අරුණ බුද්ධදාස මහතා දැනුම් දුන්නා.
අනතුරුව සැකකරු සැප්තැම්බර් මස 04 වැනිදා දක්වා රක්ෂිත බන්ධනාගාර ගත කිරීමට මහේස්ත්රාත්වරයා නියෝග කර සිටියා.
