මස්කෙළිය, ගාඩ්මෝර් දිය ඇල්ල පිහිටි ප්‍රදේශය 2026 වසර වන විට සංචාරකයින්ගේ ගමනාන්තයක් බවට පත් කිරීමට පියවර ගන්නා බව සංචාරක නියෝජ්‍ය අමාත්‍ය මහාචාර්ය රුවන් රණසිංහ මහතා පවසනවා.
නියෝජ්‍ය අමාත්‍යවරයා මේ බව කියා සිටියේ මස්කෙළිය ගාඩ්මෝර් දිය ඇල්ල පිහිටි ප්‍රදේශයේ සංචාරයකට ඊයේ(09) එක්වෙමිනි.
වැඩිදුරටත් අදහස් දක්වමින් නියෝජ්‍ය අමාත්‍යවරයා කියා සිටියේ සංචාරකයින්ගේ ආකර්ෂණයක් සහිත මෙවැනි ප්‍රදේශ සංවර්ධනය කිරීමෙන් එම ප්‍රදේශවල ජනතාවගේ ආර්ථික තත්ත්වයද වැඩි දියුණු කළ හැකි බවයි.
එසේම සියලුම ආයතන සම්බන්ධ කරගනිමින් ප්‍රදේශය විශේෂ සංචාරක ආකර්ශණීය ප්‍රදේශයක් ලෙස අනාගතයේදී සංවර්ධනය කළ හැකි බවද නියෝජ්‍ය අමාත්‍යවරයා පෙන්වා දුන්නා.
ගාඩ්මෝර් දිය ඇල්ල ආශ්‍රීත ප්‍රදේශය සංවර්ධනය කිරීමට මීට පෙරද යෝජනා ඉදිරිපත් වී ඇතත් ඒවා ක්‍රියාත්මක වී නොමැති බවද ඔහු කියා සිටියා.
එහිදී වැඩිදුරටත් මාධ්‍ය වෙත අදහස් දක්වමින් නියෝජ්‍ය අමාත්‍යවරයා මෙලෙස කියා සිටියා.
“මෙම ප්‍රදේශයට බොහෝ සංචාරකයින් පැමිණියද ඒ අයට අවශ්‍ය පහසුකම් නෑ.
හෙලිකොප්ටර් වැනි නවීන පහසුකම් මෙහි ඇති කළ හැකියි. අපගේ රජයේ ඊළඟ අය වැයෙන් මේ සඳහා මුදල් වෙන් කරනවා.
මෙම ප්‍රදේශයට පිවිසෙන ප්‍රධාන මාර්ගය සංවර්ධනය කිරීමට පළාත් සංවර්ධන අධිකාරියට මුදල් වෙන් කර තිබෙනවා.
මේ හා සම්බන්ධ සංවර්ධන කටයුතු කඩිනමින් සිදුු කරනවා.
දිය ඇල්ල පිහිටි ප්‍රදේශය පෞද්ගලික වතුයායක් නිසා මස්කෙළිය ප්‍රාදේශිය සභාව හරහා අදාල ක්‍රියාමාර්ග ගනු ලබනවා.
ඇල්ල, මහනුවර හා හම්බන්තොට වැනි ප්‍රදේශවල සංචාරක ප්‍රජාව වැඩිවී ඇති ආකාරයටම සංචාරක සංවර්ධන අධිකාරිය හරහා නව මධ්‍යස්ථානයක් ඇති කිරීමට අපි පියවර ගන්නවා.
වැවිලි යටිතල පහසුකම් අමාත්‍ය සමන්ත විද්‍යාරත්න මහතා උඩරට වතුකර ජනතාව සඳහා අහාර, නිවාස,අධ්‍යාපනය හා සෞඛ්‍ය සේවා වැනි මූලික පහසුකම් සපයනවා.
මේ වන විට උඩරට වතුකර ජනතාව සඳහා ස්ථීර ලිපිනයන් ලබාදීමට පියවර ගෙන තිබෙනවා.
පළමුව උඩරට වතුකර ජනතාව සඳහා නිවාස යෝජනා ක්‍රම ලබාදීමෙන් පසුව ඔවුන්ට ඉඩම් අයිතිවාසිකම් ලබාදීමට අවශ්‍ය සාකච්ඡා පවත්වමින් සිටිනවා.
පසුගිය රජය මෙන් නොව වතු කම්කරුවන් වෙනුවෙන් ව්‍යාජ ගැසට් පත්‍රයක් ප්‍රකාශයට පත් කරමින් ජනතාව රැවටීමට අපි සූදානම් නෑ.
ඔවුන්ගේ ජීවනෝපාය නිසි ලෙස ඉදිරියට ගෙනයාම සඳහා නිසි වැටුපක් ලබා දීමටද අපගේ රජය පියවර ගන්නවා.”
මෙම නිරීන්ෂණ චාරිකාව සඳහා නුවරඑළිය දිස්ත්‍රික් පාර්ලිමේන්තු මන්ත්‍රීනි ක්‍රිෂ්ණන් කලෙයිචෙල්වි මහත්මිය සමග මස්කෙළිය ප්‍රාදේශිය සභාවේ මන්ත්‍රීවරුන් පිරිසක් සහභාගීව සිටියා.
