කෝටි දෙකකට ආසන්න වටිනාකමක් ඇති අයිස් මත්ද්‍රව්‍ය සමඟ සංවිධානාත්මක අපරාධකරුවෙකු මෙන්ම බන්ධනාගාරයේ සිට මෙරට මත්ද්‍රව්‍ය ජාලය මෙහෙයවනු ලබන බව කියන පානදුර කුඩු සලිඳු නමැත්තාගේ ප්‍රධාන ගෝලයා බව කියන පුද්ගලයෙකු පොලිස් විශේෂ කාර්ය බලකාය විසින් අත්අඩංගුවට ගෙන තිබෙනවා.
පොලිස් විශේෂ කාර්ය බලකාය කියා සිටියේ පානදුර, දික්තුඩුව පාර, අළුබෝමුල්ල ප්‍රදේශයේදී සිදු කරන ලද වැටලීමකදී 31 හැවිරිදි සැකකරු අයිස් මත්ද්‍රව්‍ය කිලෝ 1 ග්‍රෑම් 40ක් සමග අත්අඩංගුවට ගැනුණු බවයි.
එලෙස අත්අඩංගුවට ගැනුණු මත්ද්‍රව්‍ය තොගයේ වීථි වටිනාකම රුපියල් කෝටි දෙකකට ආසන්න බවයි පොලිස් විශේෂ කාර්ය බලකාය පවසන්නේ.
අත්අඩංගුවට ගත් සැකකරු වැඩිදුර විමර්ශණ කටයුතු සඳහා පොලිස් මත්ද්‍රව්‍ය නාශක කාර්යංශය වෙත භාර දුන් බවද පොලිස් විශේෂ කාර්ය බලකාය කියා සිටියා.
සැකකරු, සංවිධානාත්මක අපරාධකරුවෙකු හා මහා පරිමාන මත්ද්‍රව්‍ය ජාවාරම්කරුවෙකු වන දැනට අපරාධ පරීක්ෂණ දෙපාර්තමේන්තුව භාරයේ පසුවන පානදුර සලිඳු නැමැත්තාගේ පුධාන ගෝලයකු හා ඩුබායි රාජ්‍යයේ සිට මෙරට වත්ද්‍රව්‍ය ජාවාරම හසුරවන නිලංග නැමැත්තාගේ මෙරට මත්ද්‍රව්‍ය ජාවාරම සිදුකරන සමීපතමයකු බවට තොරතුරු අනාවරණය කරගෙන තිබෙනවා.
විශේෂ කාර්ය බලකාය අණදෙන නිලධාරී ජේෂ්ඨ නියෝජ්‍ය පොලිස්පති නීතීඥ වරුණ ජයසුන්දර මහතාගේ නියෝග හා උපදෙස් පරිදි අධ්‍යක්ෂ බුද්ධි පොලිස් අධිකාරී එම්.එම්.කේ. විජේසිංහ මහතාගේ මගපෙන්වීම මත සහකාර පොලිස් අධිකාරී (බුද්ධි/විශේෂ මෙහෙයුම්/මත්ද්‍රව්‍ය නාශක හා සංවිධානාත්මක අපරාධ මර්ධන) සාගර කුලසේකර මහතාගේ අධීක්ෂණය යටතේ විශේෂ මෙහෙයුම් අංශය III හි උප ස්ථානාධිපති පොලිස් පරීක්ෂක බී.එස්.ඊ.එච්. මෙන්ඩිස් ඇතුළු නිලධාරීන් කණ්ඩායමක් මෙම වැටලීම සිදු කර තිබෙනවා.
