පවතින එල්නිනෝ දේශගුණික තත්ත්වය හේතුවෙන් ශ්‍රී ලංකාවට මේ වසරේ අවසාන භාගයේ දී වඩා වැඩි වර්ෂාපතනයක් ඇතිවීමේ හැකියාවක් පවතින බව එක්සත් ජාතීන්ගේ සංවිධානය පවසනවා. එහිදී ගංවතුර, ජලයෙන් යටවීම් සහ කෘෂිකාර්මික කටයුතුවලට බලපෑම් ඇතිවීමේ අවදානමක් පවතින බවයි එම සංවිධානය පෙන්වා දෙන්නේ. එල්නිනෝ දේශගුණික තත්ත්වය පිළිබදව ආසියානු කලාපයේ රටවලට සිදුව හැකි බලපෑම සම්බන්ධයෙන් වන නවතම තක්සේරු වාර්තාවේ මේ බව දක්වා තිබෙනවා.
එම තක්සේරුවට අනුව එල්නිනෝ තත්ත්වය හේතුවෙන් වැඩි අවධානයක් අවශ්‍ය රටක් ලෙස ශ්‍රී ලංකාව හඳුනාගෙන ඇති බවයි දැක්වෙන්නේ. මෙරටට අදාළ ප්‍රධාන අවදානම වන්නේ වියළි කාලගුණ තත්ත්වයට වඩා වැඩි වර්ෂාපතනයක් ලැබීම බව එම වාර්තාවේ පෙන්වා දෙනවා. ඔක්තෝබර් සහ නොවැම්බර් මාසවල ශ්‍රී ලංකාවේ බොහෝ ප්‍රදේශවලට සැලකිය යුතු වර්ෂාපතනයක් ලැබෙනු ඇති.
එමෙන්ම දෙසැම්බර් සිට පෙබරවාරි දක්වා ඊසාන දිග මෝසම සක්‍රීය වීමත් සමග සාමාන්‍යයට වඩා වැඩි වර්ෂාවක් ලැබිය හැකි බවද අදාළ තක්සේරුවේ වැඩි දුරටත් දක්වා තිබෙනවා.ශ්‍රී ලංකාව සම්බන්ධයෙන් වන වාර්තාවේ පෙන්වා දී ඇත්තේ දේශගුණික අවදානමත් සමඟ ශ්‍රී ලංකාවේ ආර්ථික පීඩනය ද ඉහළ යා හැකි බවයි.
