තද සුළං, තද වැසි සහ රළු මුහුදු ප්රදේශ සම්බන්ධයෙන් අවවාදාත්මක නිවේදනයක් කාලගුණ විද්යා දෙපාර්තමේන්තුව විසින් නිකුත් කර තිබෙනවා.
ඒ බෙංගාල බොක්ක මුහුදු ප්රදේශයේ යාත්රා කරන බහුදින ධීවර යාත්රා සහ දිවයිනේ නැගෙනහිර නොගැඹුරු මුහුදු ප්රදේශයන්හි ධීවර හා නාවුක කටයුතුවල නිරතව සිටින පිරිස් වෙතයි.
අදාල නිවේදනයේ දැක්වෙන්නේ ගිනිකොණ දිග බෙංගාල බොක්ක මුහුදු ප්රදේශයේ පැවැති පීඩන අවපාතය අද(26) උදෑසන 5.30 පමණ වන විට බටහිරට බරව වයඹ දෙසට ගමන් කර එම ප්රදේශයේම ගැඹුරු පීඩන අවපාතයක් දක්වා වර්ධනය වී අක්ෂාංශ 11.1N සහ දේශාංශ 87.2N ආසන්නයේ එනම් ත්රීකුණාමලයට කිලෝමීටර් 720ක් පමණ දුරින් ඊශාන දෙසින් කේන්ද්රගත වී පැවැති බවයි.
එය ඉදිරි පැය 24 තුළදී බටහිරට බරව වයඹ දෙසට ගමන් කර නිරිත දිග සහ යාබද බටහිර මධ්යම බෙංගාල බොක්ක ප්රදේශයේ සුළි කුණාටුවක් දක්වා තවදුරටත් වර්ධනය වී එය වයඹ දෙසට ගමන් කර එළැඹෙන 28 වනදා දින වන විට දරුණු සුළි කුණාටුවක් දක්වා වර්ධනය වීමට ඉඩ ඇති බවද සඳහන්.
එම පද්ධතිය ඔක්තෝබර් 28 වන දින ආන්ද්රා ප්රදේශ් වෙරළ තීරය හරහා දරුණු සුළි කුණාටුවක් ලෙස ගොඩබිම දෙසට ගමන් කිරීමට බොහෝ දුරට ඉඩ ඇති බවයි කාලගුණ විද්යා දෙපාර්තමේන්තුව පවසන්නේ.
උතුරු අක්ෂාංශ 05ත් 15ත් සහ නැගෙනහිර දේශාංශ 80ත් 95ත් අතර මුහුදු ප්රදේශවල නැවත දැනුම්දෙනතුරු ධීවර සහ නාවුක කටයුතුවලින් වැළකී සිටින ලෙසද කාලගුණ විද්යා දෙපාර්තමේන්තුව අනතුරු ඇඟවීමක් කර තිබෙනවා.
මේ වන විට එම ප්රදේශයේ ධීවර කටයුතුවල යෙදී සිටී නම් එම මුහුදු ප්රදේශවලින් ඉවත්වන ලෙසත් උපදෙස් ලබාදෙන බවයි එම දෙපාර්තමේන්තුව පවසන්නේ.
එසේම කාලගුණ විද්යා දෙපාර්තමේන්තුව ඉල්ලා සිටින්නේ ගාල්ල සිට හම්බන්තොට හරහා පොතුවිල් දක්වා වෙරළට ඔබ්බෙන් වන නොගැඹුරු මුහුදු ප්රදේශ ආශ්රීතව ධීවර සහ නාවුක කටයුතුවල යෙදෙන ප්රජාව මේ සම්බන්ධයෙන් අවධානයේන පසුවන ලෙසයි.
එසේම පහත තිසියමේ දැක්වෙන ඇති මුහුදු ප්රදේශවල ගිගුරුම් සහිත තද වැසි ඇති බන බවත් සුළඟේ වේගය විටින් විට පැයට කිලෝමීටර් 44ක් 65ක් දක්වා වැඩිවීමත් සමග එම මුහුදු ප්රදේශ විටින් විට රළු හෝ ඉතා රළු විය හැකි බවත් කාලගුණ විද්යා දෙපාර්තමේන්තුව පවසනවා.
පද්ධතියේ නිරීක්ෂනය සහ පුරෝකථනය කළ ගමන් මාර්ගය පහත සිතියමෙන් දැක්වේ.
ධීවර සහ නාවුක ප්රජාව කාලගුණ විද්යා දෙපාර්තමේන්තුව විසින් මේ සම්බන්ධයෙන් නිකුත් කරන ඉදිරි නිවේදන සම්බන්ධයෙන් අවධානයෙන් පසුවන ලෙසටද ඉල්ලා සිටිනවා.
