හිටපු අටමස්ථානාධිපති නාහිමියන් පරිහරණය කළ අධි සුඛෝපභෝගී ජීප් රථ දෙකක අයිතිය ඉල්ලා ව්‍යාපාරිකයෙකු පවරා ඇති නඩුවට අදාළ විරෝධතා ගොනු කරන ලෙස වත්මන් අටමස්ථානාධිපති නාහිමි ඇතුළු තුන් නමක් සහ අටමස්ථාන කාරක සභාවට අධිකරණයෙන් නියෝග කර තිබෙනවා .
අනුරාධපුර හිටපු අටමස්ථානාධිපති පූජ්‍ය පල්ලේගම සිරිනිවාස නාහිමියන් ජීවත්ව සිටියදී පරිහරණය කළ රුපියල් කෝටි 10ක් පමණ වටිනා අධි සුඛෝපභෝගී ජීප් රථ දෙකක නිත්‍යානූකූල අයිතිය තමන්ට පවරාදෙන ලෙස ඉල්ලා ව්‍යාපාරිකයෙකු අධිකරණය හමුවේ එම නඩුව පවරනු ලැබුවා .
එම නඩුවට අදාළ විරෝධතා ඇත්නම් ලබන මාර්තු මස 15වන දින හෝ ඊට පෙර අධිකරණය හමුවේ ගොනු කරන ලෙස අනුරාධපුර දිසා විනිසුරු සහ අතිරේක මහෙස්ත්‍රාත් නදීකා ඩී පියරත්න විසින් අනුරාධපුර වත්මන් අටමස්ථානාධිපති නාහිමියන් ඇතුළු වගඋත්තරකරුවන්ට නියෝග කළා.
නඩුව සම්බන්ධයෙන් යම් සමථයක් ඇත්නම් එදිනට අධිකරණයට දැනුම් දෙන ලෙසටද විනිසුරුවරිය පෙත්සම්කාර සහ වගඋත්තරකාර පාර්ශ්වයන්ට තවදුරටත් නියෝග කර ඇති බව සදහන් .
