රාජ්‍ය සේවකයින්ගේ දැනුම, කුසලතා සහ ආකල්ප වර්ධනය කිරීමේ අරමුණින් රාජ්‍ය පරිපාලන අමාත්‍යංශය මගින් හඳුන්වා දුන් “SkillUPGov” නිල Youtube නාලිකාව ඊයේ(21) පෙරවරුවේ නිල වශයෙන් ජනගත කර තිබෙනවා.
නාරාහේන්පිට පිහිටි නිලමැදුර ශ්‍රවණාගාරයේදී පැවැති රාජ්‍ය පරිපාලන, පළාත් සභා සහ පළාත් පාලන අමාත්‍යංශයේ මාසික ප්‍රගති සමාලෝචන රැස්වීමට සමගාමීව අමාත්‍ය මහාචාර්ය චන්දන අබයරත්න මහතාගේ ප්‍රධානත්වයෙන් මෙම සමාරම්භය සිදුව තිබෙනවා.
දැනුමෙන් පිරිපුන් විහිෂ්ඨ රාජ්‍ය සේවයක් උදෙසා නවීන රාජ්‍ය සේවයේ අත්‍යවශ්‍ය තාක්ෂණික පියවරක් ලෙස අමාත්‍යංශයේ මානව සම්පත් සංවර්ධන අංශය මගින් මෙම ව්‍යාපෘතිය ක්‍රියාත්මක කර ඇති අතර රාජ්‍ය සේවකයින්ගේ වෘත්තීය දැනුම යාවත්කාලීන කිරීම, නවීන ලෝකයට ගැලපෙන පරිදි කුසලතා හා ආකල්ප සංවර්ධනය කිරීම සහ තාක්ෂණය උපයෝගී කර ගනිමින් පුහුණු අවශ්‍යතා කාර්යාක්ෂමව සපුරාලීම මෙම ව්‍යාපෘතියේ ප්‍රධාන අරමුණ බවටයි වාර්තා වන්නේ.
මෙහිදී අමාත්‍යංශය යටතේ පවතින ආයතනවල පසුගිය මාසයේ ප්‍රගතිය මෙන්ම ඉදිරි සැලසුම් සම්බන්ධයෙන්ද දීර්ඝ වශයෙන් සාකච්ඡා කර තිබෙනවා.
මහජන සේවාවන් වඩාත් විනිවිදභාවයකින් සහ කඩිනමින් ඉටු කිරීමේ අවශ්‍යතාව අමාත්‍යවරයා මෙහිදී අවධාරණය කර තිබෙනවා.
මෙම අවස්ථාවට අමාත්‍යංශ ලේකම් එස්. අලෝක බණ්ඩාර මහතා ඇතුළු රාජ්‍ය පරිපාලන, ස්වදේශ කටයුතු පළාත් සභා සහ පළාත් පාලන යන අංශ තුනට අයත් ආයතන ප්‍රධාන් සහ ජ්‍යෙෂ්ඨ රාජ්‍ය නිලධාරීන් රැසක් සහභාගි වී තිබෙනවා.
