රජරට මහා වාරි පද්ධතියට එකතු වීමට නියමිත තවත් සුවිශේෂී ජලාශ ව්යාපෘතියක් වන පහළ මල්වතුඔය බහුකාර්ය සංවර්ධන ව්යාපෘතියේ කටයුතු සොයා බැලීමට ජනාධිපති අනුර කුමාර දිසානායක මහතා නිරීක්ෂණ චාරිකාවක නිරත වී තිබෙනවා.
මීට වසර 10කට පෙර ආරම්භ කළ මෙම ව්යාපෘතියේ කටයුතු විවිධ හේතුන් මත අතරමග නැවතී තිබුනා. නමුත් වත්මන් රජය යටතේ ව්යාපෘතිය යළි ආරම්භ කරමින් 2026 වර්ෂය සඳහා රුපියල් මිලියන 5000ක ප්රතිපාදන වෙන් කිරීමටයි පියවර ගැනුනේ. මතුව ඇති ගැටලු නිරාකරණය කර ගනිමින් එහි ඉදිකිරීම් කඩිනම් කර තිබීම විශේෂත්වයක් වනවා. මේ අතර සම්පූර්ණයෙන් දේශීය අරමුදල් මත ක්රියාත්මක ව්යාපෘතිය 2029 වසරේ අගභාගයේදී අවසන් කිරීමට නියමිතයි. උතුරු මැද පළාතේ අනුරාධපුර දිස්ත්රික්කය සහ උතුරු පළාතේ වවුනියාව දිස්ත්රික්කය යා කරමින් තන්තිරිමලේ බෝගොඩදී මල්වතුඔය හරස් කර, මෙම ජලාශය ඉදිකෙරෙනවා.
පහළ මල්වතුඔය ජලාශය අක්කර අඩි 169,400ක ජල ධාරිතාවකින් සමන්විත අතර මෙය ඉදිකිරීමෙන් පසු උතුරු මැද පළාතේ විශාලතම ජලාශය බවට පත් වනු ඇති. අනුරාධපුර, වවුනියාව, මන්නාරම යන දිස්ත්රික්කවල ජනතාවගේ පානීය ජල ගැටලුවට ස්ථීර විසඳුමක් ලබා දීම මෙම ව්යාපෘතියේ ප්රධාන අරමුණයි. මල්වතුඔය පහළ නිම්නයේ ග්රාමීය සංවර්ධනය හා කෘෂිකර්මාන්තයට අවශ්ය ජලය සැපයීම, තන්තිරිමලේ ප්රදේශයේ නව සංවර්ධන ප්රදේශයක් බිහි කිරීම, ජල විදුලි උත්පාදනය, ගංවතුර පාලනය සහ සංචාරක කර්මාන්තයේ හා මිරිදිය මත්ස්ය කර්මාන්තයේ ප්රවර්ධනයද මෙමගින් අපේක්ෂා කෙරෙනවා.
