කොළඹ දිසා අධිකරණය හමුවේ ඇතිකර ගත් එකඟතාව අනුව ශ්‍රී ලංකා රග්බි සම්මේලනයේ නිලවරණය නොපැවැත්වීම තුළින් අධිකරණයට අපහාස කළේ යැයි චෝදනා කරමින් ක්‍රීඩා අධ්‍යක්ෂ ජෙනරාල්වරයාට එරෙහිව ගොනුකර තිබූ නඩුවක් අවසන් කිරීමට අභියාචනාධිකරණය අද තින්දු කළා.
අධිකරණයට අපහාස කිරීම සම්බන්ධයෙන් ඔහු වෙත නිකුත් කළ චෝදනා ආපසු කැඳවීමටත් නියෝග කෙරුණා.
පෙත්සම්කරු විසින් එම නියෝග ලබාගෙන තිබෙන ආකාරය නීතියට පටහැනි බව සඳහන් කරමින් නීතිපතිවරයා වෙනුවෙන් පෙනී සිටි අතිරේක සොලිසිටර් ජෙනරාල්වරයා ඉදිරිපත් කළ කරුණු සලකා බැලීමෙන් අනතුරුවයි මෙම නියෝගය නිකුත් කෙරුණේ.
ශ්‍රී ලංකා රග්බි නිලවරණය පැවතීම සඳහා අවශ්‍ය කරන නිලවරණ කමිටුව පත් කරන බව පමණක් ක්‍රීඩා අධ්‍යක්ෂ ජෙනරාල්වරයා විසින් කොළඹ දිසා අධිකරණය හමුවේ ප්‍රතිඥාවක් ලබාදී තිබූ බවත් ඔහු එම ප්‍රතිඥාව ඒ ආකාරයෙන්ම ඉෂ්ට කර තිබෙන බවත් අතිරේක සොලිසිටර් ජෙනරාල්වරයා පෙන්වා දුන්නා.
