දරුවන්ගේ අනාගතය සමඟ ක්රීඩා නොකරන්නැයි ලංකා ගුරු සංගමයේ ලේකම් ජෝශප් ස්ටාර්ලින් මහතා ආණ්ඩුවෙන් ඉල්ලා සිටිනවා. ඒ මහතා සඳහන් කරන්නේ උසස් පෙළ විභාගය සමයේ විදුලි කප්පාදුවක් සිදු නොකරන බවට ප්රකාශ කළද දිගින් දිගටම විදුලි කප්පාදු කිරීම් සිදුවන බවයි.
මේ අතර හිටපු පාර්ලිමේන්තු මන්ත්රිනි හිරුණිකා ප්රේමචන්ද්ර මහත්මිය ද උසස් පෙළ සමයේ සිදු වන විදුලි කප්පාදුව පිළිබඳ අද මානව හිමිකම් කොමිසමට පැමිණිල්ලක් කර තිබුණා. එහිදි ඇය කියා සිටියේ හෙට දිනයේදී මානව හිමිකම් කඩවීම පිළිබඳ පෙත්සමක් ගොනු කිරීමට කටයුතු කරන බවයි.
කෙසේ වෙතත් විදුලි කප්පාදුව අත්හිටුවීමට තම මණ්ඩලය එකඟ වී නොමැති බව ලංකා විදුලිබල මණ්ඩලයේ සභාපති නලින්ද ඉලංගකෝන් මහතා අද ප්රකාශ කළා.
උසස් පෙළ විභාගය අවසන් වන තෙක් විදුලි කප්පාදුව අත්හිටුවීමට නම් ඉන්ධන මිලදී ගැනීමට රුපියල් කෝටි 410 ක් අවශ්ය බවයි සභාපතිවරයා පෙන්වා දෙන්නේ.
විභාගය පැවැත්වෙන දහවල් කාලයේ විදුලි කප්පාදු නොකළ අතර කිසියම් ප්රදේශයකට විදුලි විසන්ධි වූයේ නම් එයට හේතුව වෙනත් දෝෂයක් බවයි සභාපතිවරයා සඳහන් කලේ. කෙසේ වෙතත් රාත්රී කාලයේ විදුලි කප්පාදුව අඛණ්ඩව ක්රියාත්මක වන බවයි සභාපතිවරයා ප්රකාශ කළේ.
ඉන්ධන නොමැතිව විදුලිය සැපයිය නොහැකි නිසා ඛනිජ තෙල් සංස්ථාව ඉන්ධන සැපයීමට එකඟ වූයේ නම් ඉන්ධන සැපයිය යුතු බවත් මහජන උපයෝගිතා කොමිසම ඒ පිළිබඳව විදුලිබල මණ්ඩලය දැනුවත් කළ යුතු බවත් ඒ මහතා කියා සිටියා.
මානව හිමිකම් කොමිසමේ පැවැති සාකච්ඡාවට විදුලිබල මණ්ඩලයේ නිලධාරීන් ද සහභාගි වූ බව කී සභාපතිවරයා සඳහන් කළේ එහිදී විදුලිය නොකපන බවට නිලධාරීන් එකඟ වී නොමැති බවයි.
