පසුගියදා ඉතියෝපියාවේදී පැහැර ගැනීමකට ලක්වූ ලාංකිකයන් තිදෙනා බේරා ගැනීමට එරට ආරක්ෂක අංශ සමත්ව තිබෙනවා.
පැහැරගැනීමට ලක්වූ ලාංකිකයන් තිදෙනා පසුගියදා රැකියා බලාපොරොත්තුවෙන් ඉතියෝපියාවට ගොස් තිබෙනවා.
එහිදී මොවුන් පැහැර ගැනීමට ලක්ව ඇති බවයි වාර්තා වන්නේ.
මේ සම්බන්ධයෙන් ශ්රී ලංකා තානාපති කාර්යාලය විසින් ඉතියෝපියාවේ බෝලේහි උප නගර පොලිස් දෙපාර්තමේන්තුව වෙත වාර්තා කිරීමෙන් පසුව පසුගිය මැයි 26 වන දින මේ සම්බන්ධයෙන් විමර්ශන ආරම්භ කර තිබෙනවා.
අදාළ පරීක්ෂණවලදී අනාවරණ වී ඇත්තේ මොවුන් තිදෙනා අතුරුදන්වීමට දින කිහිපයකට පෙරදී ඉතියෝපියාවට පැමිණ ඇති බවයි.
කෙසේ වෙතත් එරට පොලිසිය සිදු කරන ලද විමර්ශනවලදී ලාංකිකයන් තිදෙනා ගුවන් තොටුපොළේ සිට රැගෙන ගිය බව කියන වාහනයක් සම්බන්ධයෙන් තොරතුරු අනාවරණ කරගැනීමට සමත්ව තිබෙනවා.
ඒ ඔස්සේ සිදු කරන ලද විමර්ශනවලදී ඉතියෝපියාවේ ඔරොමියා කලාපයේ පිහිටි නගරයක් වන සෂෙමේන් හිී ලාංකිකයන් රඳවාගෙන සිටින බවට අනාවරණ වී තිබෙනවා.
එහි වැටලීමේදී ලාංකිකයන් තිදෙනා සාර්ථකව මුදාගැනීමට එරට ආරක්ෂක අංශ සමත්ව තිබෙන අතර එහිදී සැකකරුවන් හය දෙනෙක්ද අත්අඩංගුවට ගෙන තිබෙනවා.
ඔවුන්ගෙන් දෙදෙනෙක් ඉතියෝපියානු ජාතිකයන් බවත් පාකිස්තාන ජාතිකයින් සිව්දෙනෙක්ද වනබවයි වාර්තා වන්නේ.
ඉතියෝපියානු ජාතික බුද්ධි හා ආරක්ෂක සේවය, ෆෙඩරල් පොලිසිය, තොරතුරු ජාල ආරක්ෂක පරිපාලනය සහ ඔරොමියා ප්රාදේශීය පොලිසිය එක්ව මෙම මුදා ගැනීමට සිදුව තිබෙනවා.
