මැලේසියාවේ පැවැත්වෙන වයස අවුරුදු 19 න් පහළ කාන්තා පන්දුවාර විස්ස ලෝක කුසලාන ක්‍රිකට් තරගාවලියේ සුපිරි 6 දෙනාගේ වටයට සුදුසුකම් ලබා ගැනීමේ අවස්ථාව පාකිස්තාන යොවුන් කාන්තා කණ්ඩායමට අහිමි වුණා.
ඒ, තරගාවලියේ 21 වැනි තරගයේදී ඔවුන් අයර්ලන්තය හමුවේ ලැබූ පරාජයත් සමගයි.
වර්ෂාවෙන් සිදු වූ බලපෑම හේතුවෙන් එක් ඉනිමක් පන්දුවාර 9කට සීමා වූ එම තරගයේ පළමුව පන්දුවට පහරදුන් අයර්ලන්තය කඩුලු 5 ක් දැවී රැස් කල ලකුණු සංඛ්‍යාව ලකුණු 69 ක්.
පිළිතුරු ඉනිම ක්‍රීඩා කළ පාකිස්තානයට කඩුලු 7 ක් දැවී ලබා ගත හැකි වූයේ ලකුණු 59 ක් පමණයි.
ඩක්වර්ත් ලුවිස් ක්‍රමය යටතේ පාකිස්තානය තරගය ජය ගැනීමට ලබා ගත යුතුව තිබූ ලකුණු සංඛ්‍යාව 73 ක්.
ඒ අනුව ඩක්වර්ත් ලුවිස් ක්‍රමවේදය යටතේ ලකුණු 13 ක ජයක් හිමි කර ගත් අයර්ලන්තය සුපිරි 6 වටයට සුදුසුකම් ලැබුවා.
පාකිස්තානය මෙවර තරගාවලියේදී තරග දෙකක් පරාජයට පත් වූ අතර, ඇමෙරිකාව සමග පැවැති තරගය වර්ෂාව හේතුවෙන් අත්හැර දැමුණා.
