සංවිධානාත්මක අපරාධකරුවෙකු සහ මත්ද්රව්ය ජාවාරම්කරුවකු වන සලිදු මල්සිත ගුණරත්න හෙවත් ‘කුඩු සළිඳු‘ට එරෙහිව පානදුර මහේස්ත්රාත් අධිකරණයේ ගොනුකර තිබූ නඩු ගොනු දෙකක් අස්ථානගත වීමේ සිද්ධියක් සම්බන්ධයෙන් විමර්ශන ආරම්භ කර තිබෙනවා. කෙසේ වෙතත් එම අධිකරණයේ පිස්කල් සහ සිතාසි භාරව කටයුතු කළ නිලධාරියා විදේශගත වී ඇති බවයි පොලිසිය පවසන්නේ. අදාළ නඩු ගොනු අතුරුදන් වීම සම්බන්ධයෙන් පානදුර මහෙස්ත්රාත් අධිකරණයේ රෙජිස්ට්රාර්වරිය විසින් පසුගිය 1 වැනිදා පානදුර දකුණ මූලස්ථාන පොලිසිය වෙත පැමිණිලි කර තිබුණා. එමෙන්ම අදාළ සිද්ධිය ‘බී‘ වාර්තාවක් මගින් අධිකරණයට කරුණු වාර්තා කිරීමෙන් අනතුරුව, පානදුර කොට්ඨාස අපරාධ විමර්ශන කාර්යාංශය මගින් විමර්ශන ආරම්භ කරනු ලැබුවා. කෙසේ නමුත් අධිකරණ රෙජිස්ට්රාර්වරිය විසින් පොලිසියට පැමිණිල්ල කළ පසුදින, එනම් සැප්තැම්බර් 2වැනිදා අදාළ නිලධාරියා තායිලන්තය බලා පිටත්ව ගොස් ඇති බවයි අනාවරණය වී ඇත්තේ. මෙලෙස අතුරුදන්ව ඇත්තේ ‘කුඩු සළිඳු‘ගේ මෙහෙයවීම මත පානදුර උතුර ප්රදේශයේ සිදුවූ මනුෂ්ය ඝාතනයකට අදාළ නඩු ගොනුවක් සහ අපරාධ පරීක්ෂණ දෙපාර්තමේන්තුව මගින් මුදල් විශුද්ධිකරණ පනත යටතේ පවරා තිබූ නඩුවකට අදාළ ගොනුවක් බව සඳහන් වනවා. සිද්ධියට අදාළව පානදුර කොට්ඨාස අපරාධ විමර්ශන කාර්යාංශය විසින් මේ වනවිට පානදුර අධිකරණයේ සේවයේ නියුතු නිලධාරිනියන් 07 දෙනෙකු ඇතුළුව පුද්ගලයින් 10 දෙනෙකුගෙන් ප්රකාශ ලබාගැනීමට කටයුතු කර තිබෙනවා.
