මන්නාරම, අධිකරණය සංකීර්ණය අසලදී වෙඩිතබා සිදුකළ ද්විත්ව ඝාතනය සම්බන්ධයෙන් මේ වන විට සැකකරුවන් 04 දෙනෙක් අත්අඩංගුවට ගෙන තිබෙනවා.
ප්‍රධාන වෙඩික්කරු සහ ඔහුට ප්‍රවාහන පහසුකම් සැපයූ ත්‍රී රෝද රථ රියදුරු ද ඒ අතර සිටිනවා.
සෙසු සැකකරුවන් දෙදෙනා අතර මීට ඉහතදී අඩම්පන් ප්‍රදේශයේ දී වෙඩිතබා සිදුකළ ද්විත්ව ඝාතනයට සම්බන්ධ ප්‍රධාන සැකකරුද සිටින බවයි වාර්තා වන්නේ.
මන්නාරම, අධිකරණ සංකීර්ණය අසලදී පසුගිය (16) සිදුකළ වෙඩිතැබීමෙන් කාන්තාවක් ඇතුළු පුද්ගලයින් සිව්දෙනෙකු තුවාල ලැබුවා.
එහිදී දෙදෙනෙකු මන්නාරම රෝහලට ඇතුළත් කිරීමේදී මියගොස් තිබුණා.
පොලිසිය පැවසුවේ වෙඩි ප්‍රහාරයට ලක්වී ඇත්තේ මන්නාරම, උයිලන්කුලම ප්‍රදේශයේ ඝාතන සිද්ධීන් දෙකකට අදාළ නඩුවක් සඳහා මන්නාරම අධිකරණයට පැමිණි පිරිසක් බවයි.
උයිලන්කුලම ප්‍රදේශයේ දෙපිරිසක් අතර දීර්ඝ කාලයක සිට ගැටුමක් පවතින බවත් ඒ හේතුවෙන් 2022 වසරේ දී ඝාතන දෙකක් සහ 2023 වසරේ දී ඝාතන 2ක් සිදුවී තිබෙන බව පැවසෙනවා.
