මැතිවරණ කොමිෂන් සභාව විසින් 2026 වසරේ දේශපාලන පක්ෂ පිළිගැනීම සඳහා සුදුසුකම් ඇති ක්‍රියාකාරී දේශපාලන පක්ෂවලින් අයදුම්පත් කැඳවා තිබේ.
ඒ අනුව අයදුම්පත් භාරගැනීම ජනවාරි 28 වැනිදා සිට පෙබරවාරි 28 වැනිදා දක්වා සිදු කෙරෙන බව මැතිවරණ කොමිෂන් සභාව නිවේදනය කරයි.
අයදුම්පත් අංක 2472/21 හා 2026 ජනවාරි 21 දිනැති ගැසට් පත්‍රයේ සඳහන් නිර්ණායක අනුව සකස් කළ ලේඛන සමඟ, අදාළ පක්ෂයේ ලේකම්වරයාගේ අත්සනින් ඉදිරිපත් කළ යුතුය.
අයදුම්පත්‍රය මැතිවරණ කොමිෂන් සභාවේ නිල වෙබ් අඩවියෙන්, දිස්ත්‍රික් මැතිවරණ කාර්යාලවලින් හෝ මැතිවරණ මහලේකම් කාර්යාලයෙන් ලබාගත හැකි බව සඳහන් වේ.
පක්ෂයක් පිළිගැනීමේදී, අංක 2471/24 හා 2026 ජනවාරි 13 දිනැති අති විශේෂ ගැසට් පත්‍රයේ (ආ) උප ලේඛනයේ සඳහන් අනුමත පක්ෂ ලකුණු අතරින් එම පක්ෂය සඳහා තෝරාගැනීමට අපේක්ෂිත ලකුණ නිශ්චිතව සඳහන් කළ යුතු වේ.
එසේම පක්ෂ ව්‍යවස්ථාව, නිලධාරී මණ්ඩලයේ නාම ලේඛනය, පසුගිය වසර හතර තුළ කාන්තා නිලධාරීන්ගේ විස්තර, වසර හතරක විගණනය කරන ලද ගිණුම් ප්‍රකාශ, පක්ෂයේ වත්මන් ප්‍රතිපත්ති ප්‍රකාශය සහ අවම වශයෙන් වසර හතරක කාලයක් අඛණ්ඩව ක්‍රියාත්මක වූ බව සනාථ කරන ලේඛන වෙන වෙනම ගොනු ලෙස ඉදිරිපත් කළ යුතු බවද දැනුම් දෙයි.
නිසි ලෙස සම්පූර්ණ කරන ලද අයදුම්පත් පෙබරවාරි 28 වැනිදා පස්වරු 3.00ට පෙර භාරගන්නා අතර, ඒවා අදාළ පක්ෂයේ ලේකම්වරයා විසින් ලියාපදිංචි තැපෑලෙන් යොමු කිරීම හෝ මැතිවරණ කොමිෂන් සභාව වෙත පැමිණ භාරදීම කළ හැකි බව සඳහන් වේ.
