නීතිඥවරයෙකුට සාපරාධි බියගැන්වීම් සිදුකර ඔහුගේ මෝටර් රථයට පහරදිමේ සිද්ධියට සම්බන්ධ සැකකරුවෙකු මිරිහාන පොලිසිය විසින් අත්අඩංගුවට ගෙන තිබෙනවා.
පසුගිය 30 වනදා නුගේගොඩ මහේස්ත්රාත් අධිකරණයේ විභාග වූ නඩුවක් සඳහා පෙනී සිටි නීතිඥවරුන් දෙදෙනෙකු නඩු විභාගයෙන් අනතුරුව කාර් රථයකින් පිටව යන අවස්ථාවේදී නුගේගොඩ ගම්සභා හන්දිය ආසන්නයේදී පිරිසක් විසින් මාර්ගය අවහිර කර කාර් රථය වට කරමින් මරණ තර්ජනය කර වාහනයට පහරදී අනර්ථයක් සිදු කරන ලද බවට මිරිහාන පොලිස් ස්ථානයට පැමිණිල්ලක් ඉදිරිපත් කර තිබෙනවා.
සිද්ධිය සම්බන්ධයෙන් මිරිහාන පොලිසිය ඇතුළු පොලිස් කණ්ඩායම් තුනක් විමර්ශන ආරම්භ කර ඇති බවද පොලිසිය පවසනවා.
මෙම සිද්ධියට සම්බන්ධ සැකකරුවෙකු අයුතු ජනරාශියක සාමාජිකයෙකුව සිටිමින් අයුතු අවහිරය, සාපරාධි බියගැන්වීම සහ අනර්ථය යන චෝදනා යටතේ මිරිහාන පොලිස් ස්ථානයේ නිලධාරීන් කණ්ඩායමක් විසින් අද(01) දින අලුයම මාදම්පේ, කජුලන්දවත්ත ප්රදේශයේදී අත්අඩංගුවට ගෙන තිබෙනවා.
සැකකරු වයස අවුරුදු 43ක් වන කජුලන්දවත්ත, මාදම්පේ ප්රදේශයේ පදිංචිකරුවෙක් බවයි පොලිසිය පවසන්නේ.
සැකකරු 2026 පෙබරවාරි 01 වන දින හඳුනාගැනීමේ පෙරට්ටුවක් සඳහා නුගේගොඩ මහේස්ත්රාත් අධිකරණය වෙත ඉදිරිපත් කිරීමට නියමිතයි.
නීතිඥ වෘත්තීයට බාධා කරමින් සිදු කළ මෙම ක්රියාවට සම්බන්ධ සියලු සැකකරුවන් කඩිනමින් අත්අඩංගුවට ගෙන අධිකරණය වෙත ඉදිරිපත් කිරීම සඳහා මිරිහාන පොලිසිය ඇතුළු පොලිස් කණ්ඩායමක් තුනක් වැඩිදුර විමර්ශන සිදු කරනු ලබනවා.
